Այսօր Ուրբաթ ակումբում հրավիրված մամլո ասուլիսի ժամանակ վերլուծաբան Արմեն Աղայանը անդրադարձավ ԲՀԿ համագումարում Սերժ Սարգսյանի ելույթին: Խոսելով Լեռնային Ղարաբաղի խնդրի և տնտեսական ճգնաժամը հաղթահարելու համար դրսից ստացված միջոցների կապի մասին` նախագահն ասել էր, որ Ղարաբաղի խնդրի շուրջ «քննարկումները գնում են հետեւյալ ուղղությամբ` տեսնես ի՞նչ են վաճառել, որ կարողացել են այս միջոցները ներգրավել»: «Մեկը հրապարակավ մի անհեթեթություն է հայտնում, թե «Ղարաբաղը վաճառեցին ու միջոցներ ներգրավեցին»: Մեկ ուրիշը մեկ այլ անհեթեթություն է մեջտեղ բերում: Երրորդը, հերքելով այս երկու անհեթեթությունների տրամաբանական լինելը, ինքն իրեն հարց է տալիս. «Այդ դեպքում ի՞նչ են վաճառել, որ կարողացել են այս միջոցները ներգրավել»: Սա, իհարկե, շատ զավեշտալի է: Ես հույս ունեմ, որ, ի վերջո, այս քննարկումները մի օր կգան տրամաբանական հուն, եւ հերյուրանք «արտադրող» մարդիկ կհոգնեն այս գործելաոճից, թեեւ անկեղծորեն ձեզ ասեմ, որ իմ հույսը շատ մեծ չէ»,- հավելել էր Սերժ Սարգսյանը: Արմեն Աղայանի խոսքերով`Սերժ Սարգսյանն առաջին անգամ չէ, որ մեղադրում է իրեն քննադատողներին, որ այդ քննադատողները իրեն անհիմն են մեղադրում Ղարաբաղը ծախելու մեջ: «Իրականում Սերժ Սարգսյանին ոչ ոք չի մեղադրել, թե նա պատրաստվում է Ստեփանակերտը հանձնել Բաքվին, մեղադրանքը եղել է շատ հստակ, որ Սերժ Սարգսյանը պատրաստվում է 5 շրջաններ հանձնել Ադրբեջանին: Սա հստակ ինքը ասել է սկսած զգացական արտահայտություններից` «Աղդամը մեր հայրենիքը չէ», մինչև իր ելույթների մի քիչ ավելի դիվանագիտական ձևակերպումնեը»,- ասում է նա: Վերլուծաբանի մեկնաբանությամբ` միջազգային ճգնաժամային խմբի առաջարկությունից մինչև Մադրիդյան սկզբունքները և Մայենդորֆյան հռչակագիրը ենթադրում են 5 շրջանների անմիջական վերադարձ, Քարվաճառի վերադարձ, այն բանից հետո, երբ տեղի կունենա հանրաքվե. «Հայաստանը դա պատկերացնում է այսպես, որ հանրաքվեն կլինի, Ադրբեջանը կճանաչի Լեռնային Ղարաբաղի հանրապետության անկախությունը` իր մտքում ունենալով նաև Շահումյանի շրջանը, Շահումյանի շրջանը կտան մեզ, մենք էլ կփոխանակենք Քարվաճառի հետ»: Ըստ նրա` միջազգային փորձագետները վերջերս հաճախ են հայտնում այն միտքը, թե 10-15 տարի հետո Շահումյանը կփոխանակվի Քարվաճառի հետ. «Ի վերջո, Հայաստանի և Ղարաբաղի տեսակետները հատվում են 5 շրջանի դեպքում և տարբերվում են Քարվաճառի շրջանի Բերձորի հատվածին վերաբերող մասով, և այդ պատճառով է, որ մինչ այսօր չկա պայմանագիր Ադրբեջանի հետ»: Ինչ վերաբերում է նախկին Լաչինի շրջանին, Արմեն Աղայանի համոզմամբ, 2001 թ. Քի Վեստից սկսած` նախկին Լաչինի շրջանը հանձնվում էր Հայաստանին. «Ադրբեջանը դրա հետ ոչ մի կերպ չի համաձայնում և տարբեր ձևերով քննարկում է այդ շրջան ադրբեջանցիների վերադարձի հարցը, կամ գոնե այդ շրջանը իրավաբանորեն Ադրբեջանինը համարել: Այս դեպքում իրենք թույլ կտան հայերին ակտիվորեն տեղափոխվել այդտեղ»,- կարծում է նա: Ղարաբաղի խնդրի շուրջ գործընթացների ակտիվացումը Արմեն Աղայանը պայմանավորում է ՀՀ նոր ղեկավարության նախաձեռնությամբ: Ռուսական կողմն էլ, տեսնելով Սերժ Սարգսյանի զիջողական նախաձեռնությունները, ճնշում է նրան`խաղաղարարի դերը ստանձնելով և ռազմական ներկայությունը տարածաշրջանում ավելացնելով: «Երբ պարզվեց, որ հայերը, այնուամենայնիվ, պատրաստ չեն ամեն ինչ զիջել, ռուսների նախաձեռնողականությունը մարեց»,- ասում է բանախոսը: Ըստ նրա` իրեն անհայտ պատճառներով Սերժ Սարգսյանն այսօր շատ վճռականորեն է տրամադրված ինչ-որ բան զիջելու, պարզապես նրան չեն հասկանում ո'չ դրսում, ո'չ ներսում: «Ներսում ասում են, որ Սերժ Սարգսյանը շատ թույլ է և ուզում է մի կերպ իր իշխանությունը պահել, և նրան քննադատելով Ղարաբաղը ծախելու մեջ` քաղաքական դիվիդենտներ են շահում, դրսում էլ չեն հասկանում Սերժ Սարգսյանին, քանի որ մտածում են, որ Հայաստանում այնպիսի վատ վիճակ է, որ պատրաստ են այս աստիճանի զիջումների գնալ, իսկ Թուրքիան և Ադրբեջանը ուզում են օգտվել առիթից և ավելին են պահանջում»,- կարծում է նա: Ըստ Ա. Աղայանի` այսօր Լեռնային Ղարաբաղի իշխանություններն ամբողջովին կախված են ՀՀ իշխանություններից. «Բայց իշխանության ներսում կա ընդդիմություն Սերժ Սարգսյանի վարած քաղաքականությանը, որի մի մասը գտնվում է ԼՂ-ում, և այսօր Ղարաբաղի իշխանությունները չեն կարող դա հաշվի չառնել, հատկապես, որ իրենք էլ այդ գաղափարի կրողներն են և վերջերս ավելի ազգանպաստ կեցվածք են որդեգրել, քան ՀՀ իշխանությունները»: Նա գտնում է, որ ընդդիմության առկայությունը և այն, որ Թուրքիան և Ադրբեջանը ավելի մեծ պահանջներ կներկայացնեն Սերժ Սարգսյանին, կստիպեն նախագահին հրաժարվել իր զիջողական նախաձեռնություններից: Արմեն Աղայանը հայտարարեց նաև, որ Ղարաբաղի հարցը դիվանագիտական լուծում չունի, քանի որ պատերազմն անավարտ է մնացել և պետք է ավարտվի. «Այդ ընտրությունը պատկանում է Ադրբեջանին, Հայաստանը ընտրություն չունի, Ադրբեջանը չի կարող կորցրած համարել այն, ինչ մենք մեր հաղթանակն ենք համարում, Ադրբեջանը պատրաստվում է պատերազմ սկսելուն, չի սկսում այդ պատերազմը, քանի որ միշտ վերջին րոպեին մտածում է, թե արդյոք կկարողանա հաղթել: Նա կարող է շատ երկար պատրաստվել ու միշտ պատրաստ չլինել, այդ դեպքում դա կլինի հաղթանակ»,-եզրափակեց նա: