Արցախի հանրային հեռուստատեսության գործունեությանն երեկ անդրադարձել են ԼՂՀ ԱԺ պատգամավորները, որոնք նիստի ընթացքում լսել են հանրային հեռուստառադիոընկերության 2008թ.գործունեության մասին հաղորդումը, որը ներկայացրել է հեռուստառադիոընկերության խորհրդի նախագահ Նորեկ Գասպարյանը: Նրա կողմից ներկայացված մեկուկես էջանոց հաղորդումը, ինչպես նիստի ընթացքում շեշտեց անկախ պատգամավոր Գեղամ Բաղդասարյանը, ավելի շատ նման է գործադիր տնօրենի հաշվետվության, քանի որ ներկայացվածում նշված չեն հայեցակարգային, ռազմավարական մոտեցումները: Այդ կարծիքին էր նաեւ պատգամավոր Արկադի Սողոմոնյանը, որը նշեց, որ պետք է ներկայացվեր տեղեկատվություն այն մասին, թե ինչ ուղղություններով են աշխատել, հասարակությանը հետաքրքրող ինչ խնդիրներ են քննարկել եւ այլն: Խոսելով կառույցի գործունեության մասին Գեղամ Բաղդասարյանը շեշտեց, որ հեռուստատեսությունը չի ներկայացնում հասարակական կարծիքի ողջ ներկապնակը:  «Մեզ մոտ  վեճերը ինչ-որ հարցի շուրջ, տարբեր կարծիքները, մտքերի փոխանակությունն  արդեն վերացել են: Վիճելը, կարծես թե, սարսափելի, քրեորեն հետապնդելի երեւույթ է»,-ընդգծել է նա: Գ.Բաղդասարյանին հետաքրքրեց, թե ի±նչ է արվում այդ բացը լրացնելու համար, եթե հեռուստառադիոընկերությունը ֆինանսական որեւէ խնդիր չունի: Խորհրդի նախագահն ի պատասխան խոսեց նման բանավեճերի կազմակերպման համար համապատասխան դահլիճների եւ ստուդիաների բացակայության մասին, ինչպես նաեւ տեղեկացրեց, որ նախատեսում են մոտակա մի քանի տարում այդ հարցը լուծել:: Գեղամ Բաղդասարյանը հարցրեց, թե ներկայիս պայմանները թո±ւյլ չեն տալիս նման բանավեճեր կազմակերպել: Ն.Գասպարյանը պատասխանեց, որ հնարավոր չէ: Տեղեկացնենք, որ ժամանակին հեռուստատեսության ստուդիայում, որը կա նաեւ այսօր, մի քանի թոք-շոուներ է կազմակերպվել, այդ թվում Ստեփանակերտի մամուլի ակումբի նախաձեռնությամբ: Իսկ նույն Նորեկ Գասպարյանի հեղինակությամբ եւ ԼՂՀ մշակույթի եւ երիտասարդության հարցերի նախարարության հովանավորությամբ այդ ստուդիայում դեռեւս 1999-ից նկարահանվում էր «Սանդղակ» երիտասարդական հաղորդումը, որին մասնակցում էին 1,5 տասնյակից ավելի երիտասարդներ ու քննարկում տարբեր հարցեր: Ի դեպ այդ հաղորդումը, որը միշտ էլ նկարահանվում էր նույն ստուդիայում, բավականին երկար` շուրջ 7 տարվա «կյանք» ունեցավ: Գեղամ Բաղդասարյանը նաեւ հուշեց, որ ահնրաժեշտ է հասարակական կարծիքի ուսումնասիրություն կատարել` պարզելու, թե հանրությունն ինչ կարծիք ունի հեռուստատեսության մասին: