Այսօր Հայաստանի Հանրապետության Վճռաբեկ դատարանի քրեկան պալատի նախագահ Դավիթ Ավետիսյանը և քաղաքացիական ու վարչական պալատի նախագահ Սլավա Սարգսյանը հանդիպել են Հայաստանում Եվրոպական հանձնաժողովի պատվիրակության հետ: Կարևորելով Եվրամիության հետ համագործակցության հետագա խորացումըª պալատների նախագահները վստահություն են հայտնել, որ դատաիրավական բարեփոխումներն ու օրենսդրական դաշտի կատարելագործումը հնարավորություն կտան առաջ շարժվել այդ ուղղությամբ: Հանդիպման ընթացքում պատվիրակությունն անդրադարձել է Եվրամիության «Արևելյան գործընկերության» նախաձեռնության շրջանակներում համագործակցությանը և նշել, որ այն ոչ միայն նպատակ է հետապնդում բարձր մակարդակի հասցնել քաղաքաքական, այլև տնտեսական ոլորտի հարաբերությունները: Ազատ շուկայական հարաբերություններ, և առևտրային նոր գոտիներ ստեղծելու գործում կարևորվել է ոչ միայն ապրանքների, ծառայությունների, կապիտալի ազատ հոսքերի, այլև համապատասխան իրավական դաշտի առկայությունն ու օրենքների պատշաճ կիրառումը: Վճռաբեկ դատարանի քաղաքացիական և վարչական պալատի նախագահը հակիրճ ներկայացրել է երկրում իրականացվող դատաիրավական բարեփոխումները, տնտեսական գործերով կայացված դատական նախադեպերը, անդրադարձել նաև տնտեսական բարեփոխումներին, առևտրի և ներդրումների ոլորտում օրենքները Եվրամիության և միջազգային այլ ստանդարտներին համապատասխանեցնելու խնդիրներին: Նրա խոսքերով, տնտեսության զարգացման վերաբերյալ ընդունվել են բազմաթիվ օրենքներ, և° ֆիզիկական և° իրավաբանական անձանց իրավունքների պաշտպանության առումով առկա են զգալի նվաճումներ, թեև անելիքներ դեռ կան: Միայն 2008 թվականի հունվարի մեկից գործող Վարչական դատարանի կողմից քննվող գործերի հիմնական մասը վերաբերել են ձեռնարկատիրական գործունեությանը, պետության և ձեռնարկատերերի միջև ծագած իրավահարաբերությունների կարգավորմանը: Պատվիրակության անդամներն անդրադարձել են սպառողների շահերի պաշտպանության և պարենային անվտանգության խնդիրներին: Քրեական պալատի նախագահ Դավիթ Ավետիսյանը նշել է, որ թե° սպառողների, թե° հակամրցակցային հանցագործությունների, և թե կեղծ արժեթղթերի հետ կապված հանցատեսակների 70-80 տոկոսը վերջին երկու տարում համապատասխան փոփոխությունների է ենթարկվել, հաշվի են առնվել Եվրամիության չափանիշները: Ըստ նրաª ՀՀ քրեական օրենսգիրքն այսօր բավարար մեխանիզմներ ունի տնտեսական հանցագործությունների դեմ արդյունավետ պայքարելու համար: Հանդիպման ավարտին կողմերը ձեռք են բերել փոխադարձ համաձայնություն հետագա համագործակցության վերաբերյալ և հույս հայտնել, որ փորձի փոխանակման միջոցով հնարավոր է հասնել առավել մեծ արդյունքների: Այս մասին հայտնում է ՀՀ վճռաբեկ դատարանի մամուլի գրասենյակը: