Փետրվարի 21-ին` շաբաթ օրը, տեղի կունենա Թեղուտի Պաշտպանության Խմբի և Կանաչ Լույս Արշավի կողմից համատեղ կազմակերպված «Կանաչ երթ. Հանուն բնության և օրինապահության» հանրային գործողությունը: Թեղուտի Պաշտպանության Խմբի տարածած հաղորդագրության համաձայն՝ Գործողության նպատակն է հասարակության ուշադրությունը հրավիրել բնությունը հարգելու և օրինակելի քաղաքացիական վարքագծով առաջնորդվելու գաղափարների վրա: Գործողության մասնակիցները կհավաքվեն Սիրահարների այգում (Բաղրամյան պող.) ժամը 13:00:  Գործողությունը կմեկնարկի մոտավորապես ժամը 13:30-13:45-ին նախապես գործողության ծրագիրը ներկայացնելուց և միմյանց հետ ծանոթանալուց հետո:  Մասնակցությունը ազատ է: Գործողության կմասնակցեն թե' հեծանվորդներ, թե' հետիոտներ:  Հեծանվորդները կշրջեն Երևան քաղաքի Կենտրոն համայնքով նախօրոք սահմանված երթուղով` դրոշներով և կարգախոսներով հանրությանը ներկայացնելով գործողության գաղափարները: Հետիոտները կբաժանվեն երկու հոգանոց խմբերի:  Վերջիններս մայթերի մոտ կանգնած ավտոմեքենաների դիմապակիների վրա կթողնեն թռուցիկներ, որոնք կոչ կանեն վարորդներին ճանապարհը զիջել հետիոտնին, կամ եթե վարորդը սխալ է կանգնեցրել ավտոմեքենան (ասենք` երթուղային տաքսու համար նախատեսված վայրում), ակնարկ կանեն դրա վերաբերյալ կրկին թռուցիկի միջոցով: Ցրվելով քաղաքով մեկ` Չնայած հեծանվորդներն ու հետիոտները կբաժանվեն ու կցրվեն քաղաքով մեկ, այնուամենայնիվ նրանք կհանդիպեն 3 կետերում` Կարապի լճին հարակից տարածքում, Երևանի Պետական Բժշկակական Համալսարանի մոտ և Սայաթ-Նովա/Մաշտոց խաչմերուկում, որտեղ բուկլետներ և տեղեկատվական թերթիկներ կբաժանվեն անցորդներին: Գործողությունը կավարտվի ժամը 16:00 Սիրահարների այգում: