Ապահով բնակարանների սղության մասին են ԼՂՀ վարչապետ Արա Հարությունյանի հետ հանդիպման ժամանակ խոսել Մարտակերտի շրջանի  վերաբնակեցվող Հովտաշեն եւ Նոր Սեյսուլան գյուղերի բնակիչները: Նոր բնակարանների կառուցման եւ հների վերականգնմանը զուգահեռ նրանք անդրադարձան բուժկետի, ակումբի, ճանապարհների, գյուղտեխնիկայի, բերքի իրացման խնդիրներին, որոնք չեն լուծվում համայնքային ուժերով: Ինչպես հայտնում են ԼՂՀ կառավարության տեղեկատվության եւ հասարակայնության հետ կապերի վարչությունից, ընդհանուր առմամբ դրական գնահատելով իրենց գյուղապետերի աշխատանքը` բնակիչները նշեցին, որ մի շարք հարցերում ունեն պետական աջակցության կարիք: Եթե Հովտաշենում դեռ կա խմելու ջրի պակաս, ապա Նոր Սեյսուլանը շուրջօրյա ապահովված է ոչ միայն խմելու, այլեւ ոռոգման ջրով: Այս վերջին փաստի կապակցությամբ վարչապետը շեշտել է, որ ներկայումս չափազանց կարեւոր է ունեցած հնարավորությունները լիովին օգտագործելը: Նորսեյսուլանցիները կարող են լայնորեն զբաղվել հացահատիկի եւ եգիպտացորենի արտադրությամբ պետական այն ծրագրերի շրջանակներում, որոնք ուղղված են այդ մշակաբույսերի ծավալուն մշակությանը: Իրացման դժվարություններ չեն լինի, եթե իսկապես ստացվի հարուստ ու որակյալ բերք` պարզաբանել է Ա.Հարությունյանը: «Կլինի կառավարության աջակցությունը տների վերակառուցման հարցում, բայց եւ ժամանակն է, հայտարարել է վարչապետը, որ բնակիչներն իրենք սեփական ուժերով հոգան բնակարանային կարիքները, հատկապես վերանորոգման մասով: Պետության խնդիրն է` գյուղի մարդկանց համար ապահովել աշխատանքի` գյուղատնտեսությամբ զբաղվելու լավ պայմաններ, որպեսզի մարդիկ վաստակելու հնարավորություն ունենան եւ հոգան իրենց բարեկեցության հարցերը: Տարբեր ծրագրերով Հովտաշենում եւ Նոր Սեյսուլանում կշարունակվի նոր տների կառուցումը, որը պիտի ուղեկցվի սեփական միջոցներով շինարարությամբ: Կառավարությունը կօգնի շինանյութերով, իսկ մնացած աշխատանքները կանեք ինքնուրույն»- հայտարարել է վարչապետը: Վարչապետը հանդիպել է նաեւ ուսուցիչների հետ: Արձագանքելով ուսուցիչների հիմնավորված առաջարկություններին` Ա.Հարությունյանը խոստացավ աջակցել կրթօջախում երկարօրյա դասընթացի բացման եւ ուսումնական շենքի ընդարձակման հարցերում: