Այսօր Ազգային ժողովում  նախքան նիստի մեկնարկը օպերատորներին աշխատանքային նորամուծություն էր սպասվում: ԱԺ աշխատակազմի ղեկավար Գեղամ Ղարիբջանյանը ԱԺ հսկիչներին տեղեկացրել է, որ նիստը սկսվելուց 30 րոպե հետո ներկա օպերատորներին եւ ֆոտոլրագրողներին դուրս հրավիրեն: Լրագրողներին հնարավորություն է ընձեռվում ներկա լինել նիստերին, սակայն օպերատորները նիստերին հետեւելու եւ ձայնագրելու են  ԱԺ միջանցքում տեղադրված 2 մոնիտորներից:  Նորամուծությունը օպերատորների եւ ֆոտոլրագրողների կողմից բացասական վերաբերմունքի արժանացավ: Ազգային ժողովի այսօրվա քառօրյա նիստը մեկնարկեց, ինչպես եւ միշտ, ներկաների հաշվառմամբ:  Հայտարարվեց, թե դահլիճում ներկա է 104 պատգամավոր: «Ժառանգության» վարչության նախագահ Անահիտ Բախշյանը այս անգամ էլ կատարեց սեփական հաշվարկ եւ հակադրվեց` ասելով, թե  խորհրդարանի դահլիճում ներկա են 98 պատգամավոր։ ԱԺ նախագահ Հովիկ Աբրահամյանն հայտարարեց օրակարգում  ընդգրկված մի շարք օրինագծերի քննարկումը մինչև 30 կամ մինչև 60 օրով հետաձգելու մասին:  Օրինագծերը քննարկման են դրվել ու ձայների մեծամասնությամբ հետաձգվել, օրինակ  «ՀՀ քրեական օրենսգրքում փոփոխությունների և լրացումներ կատարելու մասին», «Խղճի ազատության և կրոնական կազմակերպությունների մասին» ՀՀ օրենքում փոփոխություններ և լրացումներ կատարելու մասին, «ՀՀ տոների և հիշատակի օրերի մասին» ՀՀ օրենքում լրացումներ կատարելու մասին օրենքի նախագծերը եւ այլն: Խորհրդարանի նախագահը պատգամավորներին նկատողություն է արել` չքվեարկել ուրիշների փոխարեն: Այնուհետեւ ստվերի կրճատման վերաբերյալ զեկույց ներկայացրեց  ՀՀ տնտեսական մրցակցության պաշտպանության պետական հանձնաժողովի նախագահ Աշոտ Շահնազարյանը: «Ժառանգություն» խմբակցության անդամներ Լարիսա Ալավերդյանն ու Արմեն Մարտիրոսյանը ներկայացրեցին մի շարք նկատառումներ: Ա. Մարտիրոսյան նշեց, որ պետք է զեկույցում ներառվի դիզվառելիքի եւ բենզինի հարցը, որովհետեւ «գազի թանկացման անվան տակ գազալցակայանները, երբ  1 խորանարդ մետրն ավելանում է 16 դրամով, իսկ նրանք ավելացնում են 130-200 դրամ, այսինքն 10 անգամ ավել են վաճառում, իսկ հանձնաժողովը զեկույցում ներկայացրել է, որ իրենց նախազգուշացնող որոշումն ունեցավ դրական հետեւանք` տվյալ ապրանքային շուկայում իրացման գինը 200 դրամից նվազեց մինչեւ 160 դրամ»: Ա. Մարտիրոսյանը  մատնանշում է նաեւ զեկույցի վերջին տողը, որը, ըստ նրա, մեր տնտեսության եզրակացությունն է. «Իրական խոչընդոտներ են հանդիսանում ոչ տնտեսական բնույթի գործոնները, իշխանության մարմինների եւ խոշոր ձեռնարկությունների միջեւ արդեն կայացած ոչ ֆորմալ հարաբերությունները»: Ա.  Մարտիրոսյանի ելույթի ժամանակ պատգամավորները սկսեցին լքել դահլիճը: Սովորաբար մինչեւ առաջին ընդմիջումը դահլիճը սկսվում է դատարկվել եւ այս անգամ էլ աշխատանքները շարունակվեցին 20-30 պատգամավորի ներկայությամբ: Ի դեպ,  ընդունվածի համաձայն, դահլիճը լքեց նաեւ ԱԺ նախագահ Հովիկ Աբրահամյանը։ Պատգամավոր Լարիսա Ալավերդյանն էլ իր ելույթը սկսեց հիշեցումով, որ այսօր սկսվում է Մեծ պահքը եւ խորհուրդ տվեց պատգամավորներին օգտագործել այդ օրերը «մտորելու և զուսպ կեցվածքով հանդես գալու համար»: Ներկայացվեցին նաեւ նախագահ Սերժ Սարգսյանի երկու հրամանագրերը`  «ՀՀ և Չեխիայի հանրապետության միջև եկամուտների և գույքի կրկնակի հարկումը բացառելու և հարկումից խուսափելը կանխելու մասին» համաձայնագիրը  եւ «ՄԻ կողմից ՀՀ և մյուս կողմից՝ Եվրոպական համայնքների ու դրանց անդամ պետությունների միջև գործընկերության և համագործակցության համաձայնագրին Բուլղարիայի հանրապետության և Ռումինիայի միանալու մասին» արձանագրությունը: