Գլխավոր դատախազության կոռուպցիոն եվ կազմակերպված  հանցագործությունների գործերով  վարչությունում նախորդ տարվա ընթացքում ստացվել է 610 դիմում: Այդ թվում՝ 17-ը` նախագահի աշխատակազմից, 10- ը՝ Ազգային Ժողովից, 7-ը՝ կառավարությունից, 2-ը՝ մարդու իրավունքների պաշտպանից, 2-ը՝ զանգվածային լրատվամիջոցներից, 1- ը՝ հասարակական եւ քաղաքական կազմակերպություններից, 39 դիմում՝ պետական եւ տեղական ինքնակառավարման մարմիններից: Մնացած դիմումներն ստացվել են  քաղաքացիներից եւ  տարբեր գործերով դատավարության մարմիններից: Գլխավոր դատախազության մամլո ծառայության տեղեկացմամբ` ստացված դիմումները վերաբերել են. •  քրեական հետապնդում հարուցելուն, •  հետաքննության եւ նախաքննության  օրինականության նկատմամբ  հսկողություն իրականացնելուն, •  մեղադրանքի պաշտպանությանը, •  պետական շահերի պաշտպանոությանը, •  դատարանի վճիռների, դատավճիռների եւ որոշումների բողոքարկմանը, •  դիմում պատիժների եւ հարկադրանքի  այլ միջոցների  կիրառման օրինականության  նկատմամբ հսկողության իրականացմանը: Ուսումնասիրությունները ցույց են տվել, որ  հանրապետության մարզերում  եւ համայնքներում 2008 թ. ընթացքում կոռուպցիոն բնույթի դիմումների թիվը կազմել է  223, որոնցից 23 -ը եղել են անանուն: Անանուն դիմում-բողոքներից միայն 2-ն են համապատասխանել իրականությանը (Արարատ՝ 1, Արմավիր՝ 1): Դրանք վերաբերել են տեղական ինքնակառավարման մարմիններում կատարված չարաշահումներին: Այդ բնույթի դիմումների թիվն առավել շատ է եղել  Գեղարքունիքի մարզում՝ թվով 42, Շիրակում՝ 39, Արմավիրում եվ Արագածոտնում 16-ական, Լոռվա մարզում՝ 15, Վայոց Ձորում՝ 14: Համաձայն ուսումնասիրությունների՝ մարզերում եվ համայնքներում  ստացված դիմում-բողոքներից 115-ը վերաբերել  են  տեղական ինքնակառավարման  մարմինների  գործունեությանը, 44-ը՝ պետական պաշտոնատար անձանց ու մարմիններին, իսկ մնացածը՝ կոռուպցիոն երեվույթների հետ առնչվող այլ անձանց գործողություններին: