Կիրո Մանոյան. «Թուրքիան ոչ մի անելիք եւ ասելիք չպիտի ունենա Արցախի հարցի կարգավորման մեջ»
«Այդ տարածքները սակարկելի չեն, եւ դրանք, անշուշտ, պետք է մնան որպես ԼՂՀ տարածք»,-հայտարարել է ՀՅԴ Բյուրոյի քաղաքական հարցերի եւ Հայ Դատի պատասխանատու Կիրո Մանոյանը` այսօր Արցախի պետական համալսարանում ուսանողների հետ հանդիպման ժամանակ:
Նրա խոսքերով, հիմա ասել, թե ԼՂԻՄ-ն է միայն մեր ուզածը` սխալ է, քանի որ դա ուզում էինք 1988-ին: «Շատ բան է փոխվել 1988-ից հետո: 1988-ին եթե ԼՂԻՄ-ը միացնեին Խորհրդային Հայաստանին` կարող էր հարցը վերջանար, բայց չարեցին: Խաղաղ, քաղաքական, սահմանադրական պայքարին Ադրբեջանը պատասխանեց բռնի ուժով»,-շեշտել է Կիրո Մանոյանը:
Նա միաժամանակ շարունակելով, այսպես ասած, ազատագրված տարածքների թեման, ընդգծել է, որ ինչ անուն էլ դրվեն այդ տարածքներին, միեւնույն է դրանք հայերինն են: Նա նաեւ խոսեց մադրիդյան սկզբունքների` հատկապես տարածքների հանձնման հետ կապված մասի հետ իր անհամաձայնության մասին, շեշտելով, որ այդ սկզբունքների հիման վրա չէ, որ պիտի ընթանան բանակցությունները:
Կիրո Մանոյանը նշել է, որ ղարաբաղյան կարգավորման բանակցությունների մեկ կարեւոր մասի նկատմամբ ունեն վերապահումներ, բայց, մի բան հաստատ է` ամրագրվել է, որ Արցախն այլեւս չի կարող վերադարձվել Ադրբեջանին:
Անդրադառնալով ղարաբաղյան խնդրի կարգավորման վերջին զարգացումներին, Թուրքիայի կողմից ցուցաբերվող ակտիվությանը, նրա` որպես միջնորդ հանդես գալու փորձերին, շեշտել է, որ «Թուրքիան ոչ մի անելիք եւ ասելիք չպիտի ունենա Արցախի հարցի կարգավորման մեջ»:
Վերջին զարգացումների եւ իրողությունների փոփոխման պարագայում, ՀՅԴ ներկայացուցչի կարծիքով, շեշտը պետք է դնել Ղարաբաղի վերաբնակեցման վրա: «Դժբախտաբար մենք որոշ ժամանակ ենք կորցրել, եւ այդ կորցրած ժամանակը վերստին ձեռք բերելու համար շատ արագ տեմպով պետք է անցնենք վերաբնակեցման աշխատանքներին` բայց հստակ ծրագրված»,-ավելացրել է նա:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել