Տեսանյութեր
Լուսանկարներ
«Ադրբեջանահայության օրինական իրավունքներն ու շահերը մոռացության են մատնված նաև այսօր»
«Փախստականները եւ միջազգային իրավունքը» քաղաքացիական հասարակության ցանցի հայտարարությունը Սումգայիթի սպանդի 21-րդ տարելիցի կապակցությամբ
1988թ. ի վեր ամեն տարի փետրվարի վերջին ողջ հայությունը հիշում է ադրբեջանական Սումգայիթ քաղաքում խաղաղ հայ բնակիչների հանդեպ Ադրբեջանի իշխանությունների և քրեական տարրերի կողմից կազմակերպված և իրագործված արյունալի ոճիրը:
Սումգայիթի դեպքերն ազդարարեցին Ադրբեջանում հակահայկական հալածանքների ու բռնությունների հերթական, սակայն ընդգրկումով աննախադեպ նոր ցեղասպան ալիքի սկիզբը: Այդ ալիքի զոհը դարձավ Կիրովաբադի, Ղազախի, Խանլարի, Դաշկեսանի, Մինգեչաուրի և Բաքվի ու այլ բնակավայրերի հայությունը:
Մեր ադրբեջանահայ հայրենակիցները դարձան մի կողմից ԽՍՀՄ և Ադրբեջանի իշխանությունների վարած քաղաքականության, մյուս կողմից` Հայաստանի իշխանությունների և համաժողովրդական շարժման առաջնորդների անպատրաստության և անփորձության պատանդը, որի շահերն ու իրավունքները անտեսվեցին ու ոտնահարվեցին այն մղձավանջի օրերին:
Փախստական դարձած ադրբեջանահայության օրինական իրավունքներն ու շահերը մոռացության են մատնված նաև այսօր և ցավոք, թերևս, առաջին հերթին ՀՀ և ԼՂՀ իշխանությունների կողմից, որոնք չեն ցանկանում ընդունել, որ անտեսելով հայ փախստականների հիմնախնդիրը հիմք են տալիս մտածելու, որ հետագայում կարող են անտեսել նաև միմյանց շահերը: Արդյունքում` ձեռքից կտան այսքան զոհերի և ջանքերի գնով ձեռք բերված մեր անկախ պետականությունը:
Պարոնայք պետական այրեր, դուք պատասխանատու եք ադրբեջանահայության ճակատագրի համար, դուք պատասխանատու եք Գետաշենի և Շահումյանի ճակատագրի համար: Մենք Ձեզ հորդորում ենք որդեգրել մեր ժողովրդի բոլոր հատվածների շահերն ու իրավունքները պաշտպանող մոտեցումներ: Միայն այդ դեպքում կունենանք ընդհանուր հաղթանակ և կկարողանանք պաշտպանել մեր համազգային արժեքները:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել