ԱԺ  պատգամավոր Կարեն Ավագյանը երեկվա կառավարության  հարցուպատասխանի ժամանակ հետաքրքրվել է, թե ինչ է լինելու այն ուսանողների ճակատագիրը, եթե որոշ բուհեր զրկվեն արտոնագրից եւ փակվեն: Հիշեցնենք, որ  կրթության ու գիտության նախարարության համապատասխան հանձնաժողովն առաջիկայում քննարկելու է 13 մասնավոր բուհերին արտոնագրից զրկելու հարցը: Կրթության եւ գիտության նախարար Սպարտակ Սեյրանյանը ասել է, որ նախարարությունը ուսումնասիրություններ է կատարել եւ որեւէ ուսանող չի տուժելու, քանի որ «գործընթացը կատարվում է հենց ուսանողների շահերից ելնելով, որ նրանք ստանան լիարժեք բուհական կրթություն»: Համաձայն 13 բուհերի տրամադրած ցուցակի`  այդտեղ սովորում է ընդամենը 1100 ուսանող, կեսը` հեռակա: Նախարարը վստահեցնում է, որ ուսանողներին  հնարավորություն է ընձեռվելու կամովին  ընտրել, թե որ բուհում են շարունակելու ուսումը, իսկ վարձավճարների տարբերությունն էլ չի վնասելու տեղափոխված ուսանողների գրպանը: Վերոնշյալ բուհերի նախորդ տարիների ուսանողների դիպլոմներն էլ օրինական են համարվելու, «եթե դրանք, իհարկե, պետական նմուշի դիպլոմներ են»: