Ոռոգման նոր նախագիծ` Մարտունու շրջանի համար
«Հայջրնախագիծ» ինստիտուտի մասնագետները ԼՂՀ կառավարության պատվերով օրերս իրենց մշակած հերթական տնտեսական նախագիծն են ներկայացրել վարչապետ Արա Հարությունյանին:
Ըստ նախագծի, ոռոգման ծրագիր է նախատեսվում Մարտունի քաղաքի, Քաջավանի եւ Կաքավաձորի տարածքում, որտեղ տարվա որոշ եղանակներին ջրի պակասը սահմանափակում են հողագործությամբ զբաղվելու հնարավորությունները:
«Հայջրնախագիծ» ինստիտուտի մասնագետներն առաջարկում են տարածքի ոռոգման համար օգտագործել խորքային ջրերը. նախատեսվում է 22 ջրհոր փորել, 17 ավազան կառուցել, ինչի արդյունքում` կոռոգվի 737 հեկտար տարածություն:
Ոռոգման նոր համակարգի առավելություններից օգտվելու են Մարտունի քաղաքի սեփականաշնորհված տարածքների հողագործները: «Ոռոգման հնարավորությունը ժամանակի ընթացքում փոխելու է այդ տարածքում մշակվող կուլտուրաների տեսականին` հնարավորություն է լինելու նուռ եւ արքայանարինջ աճեցնել»,-նշվել է վարչապետի մոտ անցկացված խորհրդակցության ժամանակ:
Մեկ հեկտարի ոռոգման համար 6-7 հազար դոլարի ծախս է պահանջվում: Մասնագետների առաջարկությամբ ցանցի կառուցման աշխատանքները կիրականացվեն ըստ տեղամասերի: Փաթեթը պատրաստ կլինի առաջիկա 15 օրվա ընթացքում, եւ այն կդրվի մրցույթի:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել