ՀՀ վարչապետ Տիգրան Սարգսյանի Ռուսաստան այցի շրջանակներում, Ռուսաստանի կառավարության ղեկավարի հետ առանձնազրույցի ընթացքում կողմերն իրենց գոհունակությունն են հայտնել երկկողմ տնտեսական հարաբերությունների դինամիկ զարգացման առնչությամբ եւ քննարկել են համատեղ հետաքրքրություն ներկայացնող հարցերը: Վլադիմիր Պուտինը նշել է, որ չնայած համաշխարհային ֆինանսական եւ տնտեսական ճգնաժամի բացասական ազդեծությանը, երկու երկրների միջեւ ապրանքաշրջանառությունն աճել է 10%-ով եւ կազմել է 900 մլն ԱՄՆ դոլար: Ռուսաստանի կառավարության ղեկավարը նաեւ հայտնել է, որ Դավոսում Հայաստանի նախագահ Սերժ Սարգսյանի հետ հանդիպման ընթացքում ներկայացրել է Հայաստանի տնտեսությանն աջակցելու ռուսական կողմի ծրագրերը: Այդ օժանդակությունը շուտով կարտահայտվի ՌԴ կողմից Հայաստանին տրամադրվող կայունացնող վարկով, որի չափն է 500 մլն ԱՄՆ դոլար: Տիգրան Սարգսյանը ՌԴ իր պաշտոնակցին հրավիրել է Հայաստան եւ Վլադիմիր Պուտինը ընդունել է հրավերը, հայտնելով, որ ՌԴ երկու փոխվարչապետները, այդ թվում տարածքային զարգացման նախարար Դմիտրի Կոզակը տնտեսական գործակցության նոր էտապին անցնելու կապակցությամբ եւս կայցելեն Հայաստան:  Այս մասին տեղեկացնում է կառավարության կայքէջը: