Տեսանյութեր
Լուսանկարներ
Համանախագահները շփման գծում տեղի ունեցած միջադեպերը շատ լուրջ են գնահատում
Երեկ երեկոյան ԵԱՀԿ Մինսկի խմբի երեք համանախագահներն այցելեցին Ղարաբաղ, որտեղ երեկոյան մոտ 3 ժամյա հանդիպում ունեցան ԼՂՀ նախագահ Բակո Սահակյանի հետ:
Հանդիպումից հետո պատասխանելով լրագրողների հարցերին` ռուսաստանցի համանախագահ Յուրի Մերզլյակովը նշել է, որ հանդիպումը շատ բովանդակալից էր: «Մենք ձգտել ենք Բակո Սահակյանին հասցնել երկու նախագահների` Հայաստանի եւ Ադրբեջանի, վերջին հանդիպման ինֆորմացիան, այն մասին, թե ինչ նոր հնարավորություններ ենք այդ հանդիպմանը տեսել բանակցային գործընթացի համար, եւ կիսվել ենք մեր տպավորություններով ու պատկերացումներով: Ուրախ ենք, որ դրանք լսվել են եւ հասկացվել: Բակո Սահակյանից նաեւ լսել ենք Ղարաբաղի տնտեսական, սոցիալական վիճակի մասին ինֆորմացիա, որը մեզ համար նույնպես շատ օգտակար է»,-ավելացրել է Յու.Մերզլյակովը, որը նաեւ շեշտել է, որ մի շարք պատկերացումներ հաշվի են առվել:
«Ինչպիսինն է լինելու այս տարին Ղարաբաղյան կարգավորման համար» հարցին ի պատասխան ռուսաստանցի համանախագահը նկատել է, որ «ամենադժվարը միշտ ժամանակային գուշակումներ անելն է»: Նա շեշտել է, որ օբյեկտիվ պայմանները` ձեռքբերումների համար ստեղծված են, բայց ահա սուբյեկտիվները` առկա չեն, որն ըստ նրա «կողմերի քաղաքական կամքն է` ընդունելու դժվար, բայց անհրաժեշտ որոշումներ»:
Լրագրողները համանախագահներին հեշեցրեցին, որ իրենց երկու այցերը համընկել են սահմանային միջադեպերի հետ: Ի պատասխան ռուսաստանցի համանախագահը հույս հայտնելով, որ այս մեկը չի համընկնի, ասել է, որ սահմանային միջադեպերը, այդ թվում մոնիտորինգի ժամանակ, շատ լուրջ են գնահատում:
«Առաջին դեպքը չէ, որ մոնիտորինգի ժամանակ կրակոցներ են լինում շփման գծում, եւ գտնում եմ, որ դրանք ընդհանրապես չպիտի լինեն»,-ավելացրել է Յու.Մերզլյակովը:
Համանախագահներն այսօր հանդիպում են ունեցել նաեւ Ղարաբաղի քաղաքացիական հասարակության ներկայացուցիչների հետ:
Նրանք Երեւանում Հայաստանի նախագահի հետ հանդիպումից հետո կմեկնեն Ադրբեջան:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել