Ապրիլի 1-ից Ղարաբաղում կգործի բնական գազի նոր սակագին. ներկայումս քաղաքացիները 1 խոր. մետրի դիմաց վճարում են 84 դրամ, իսկ ապրիլի 1-ից նրանք կվճարեն 96 դրամ, խոսքը մինչեւ 10 հազար խորանարդ մետր գազ սպառողների մասին է: Բնական գազի սակագներն այսօր քննարկվել է ԼՂՀ հանրային ծառայությունները եւ տնտեսական մրցակցությունը կարգավորող պետական հանձնաժողովի նիստում: «Արցախգազ» ընկերության կողմից առաջարկվող սակագինը 99 դրամ էր, սակայն, հանձնաժողովը որոշեց սահմանել 96 դրամ: 10 հազար խորանարդ մետրից ավելի բնական գազ օգտագործողները խորանարդ մետրի դիմաց կվճարեն 80 դրամ` նախկին 59 դրամի փոխարեն: Ապրիլի 1-ից կփոխվի նաեւ էլեկտրաէներգիայի գինը. 1 կվտ-ի դիմաց Ղարաբաղի բնակիչները կվճարեն 25 դրամ` գործող 20 դրամի փոխարեն: Հիշեցնենք, որ սակագինը 25 դրամ էր դարձել դեռեւս հունվարի 1-ից, բայց կառավարությունը որոշեց մինչեւ ապրիլի 1-ը փոխհատուցել այդ 5 դրամը: