Այսօր ՀՀ արտաքին գործերի նախարար Էդվարդ Նալբանդյանն ընդունեց Արաբական Միացյալ Էմիրությունների արտաքին առեւտրի նախարար Շեյխա Լուբնա Բինթ Խալեդ Ալ Կասիմիին: ԱԳՆ Մամուլի եւ տեղեկատվության վարչության հաղորդմամբ՝ «ողջունելով հյուրին` նախարար Նալբանդյանը նշեց, որ Հայաստանը կարեւորում է Արաբական Միացյալ Էմիրությունների հետ համակողմանի համագործակցության հետագա զարգացումը եւ հույս հայտնեց, որ արտաքին առեւտրի նախարարի այցը Հայաստան նոր թափ կհաղորդի հայ-էմիրաթական առեւտրատնտեսական հարաբերությունների հետագա զարգացմանն ու խորացմանը»: Էդվարդ Նալբանդյանն ընդգծեց Հայաստանի շահագրգռվածությունը ԱՄԷ-ի  հետ   քաղաքական եւ առեւտրատնտեսական  փոխգործակցության ընդլայնման գործում` կարեւորելով դրա համար անհրաժեշտ նախադրյալների առկայությունը՝ ի դեմս ծավալուն իրավապայմանագրային դաշտի: Հայաստանի արտգործնախարարը,  գոհունակություն հայտնելով  ԱՄԷ-ի եւ Հայաստանի միջեւ ապրանքաշրջանառության դինամիկ աճի կապակցությամբ, ասաց, որ հայկական կողմը պատրաստ է քննարկել ներդրումային խոշորածավալ ծրագրերի իրականցման հնարավորությունը: Էդվարդ Նալբանդյանը խնդրեց իր ջերմագին բարեմաղթանքները եւ լավագուն ցանկությունները փոխանցել ԱՄԷ ԱԳ նախարար Շեյխ Աբդալլա բին Զայեդ Ալ Նահայանին: