Կովկասյան ինստիտուտի տնօրեն Ալեքսանդր Իսկանդարյանը այսօր հրավիրված ասուլիսի ժամանակ համոզմունք հայտնեց, որ երեկ ՀՀ նախագահի հրամանագրով Գագիկ Բեգլարյանին   Երևանի քաղաքապետ նշանակելն ակնհայտորեն կապված է Երևանում սպասվող ընտրությունների հետ, քանի որ հանրապետականներն ուզում են նրան տեսնել քաղաքապետ, «իսկ քաղաքապետ լինելով հեշտ է մնալ քաղաքապետ»,- ասաց նա: Ա. Իսկանդարյանը համոզված է, որ ընտրությունները կանցնեն արդեն բոլորին հայտնի սցենարով և ընտրություններից հետո կհայտարարվի ընտրակեղծիքների մասին, որի արդյունքում չի ընտրվել նա, ով որ պետք է ընտրվեր: Ըստ նրա` մինչև մայիսի 31-ին նշանակված Երևանի քաղաքապետի ընտրությունները, քաղաքական կյանքում կլինի որոշակի ակտիվություն:  Սակայն Ալ. Իսկանդարյանի կախատեսումներով, ոչ այնպիսի ակտիվություն, որը կհանգեցնի իշխանափոխության կամ հեղափոխության: «Չկան քաղաքական ուժեր, որոնք ընդունակ  կլինեն սկզբունքորեն իրավիճակը շուռ տալ»,- կարծում է նա: Քաղագետը համոզված է, որ նման ուժ չի կարող դառնալ նաև ՀԱԿ-ը, քանի որ արդեն ամառվա սկզբից ընդդիմության ռեսուրսները սկսեցին նվազել: «Բացի այդ, արդեն տարի է անցել, ընդդիմության սոցիալական աջակացությունն է թուլացել, իսկ կան բաներ որոնք կամ արվում են միանգամից, կամ չեն արվում ընդհանրապես: Եթե նայենք, ապա կտեսնենք, որ բոլոր ստացված և չստացված գունավոր հեղափոխությունները տեղի են ունենում ընտրությունների ժամանակ կամ դրանից հետո, որը օրինաչափ է»,-ասում է Ա.Իսկանդարյանը: Քաղաքագետն արմատական  փոփոխությունների համար բավարար հիմք չի համարում նաև տնտեսական ճգնաժամը և արժութային փոփոխությունները: Այսինքն, ըստ նրա, Հայաստանում կշարունակվի «կայուն անկայունություն իրավիճակը», եթե տնտեսական ճգնաժամը չհարվածի այնպիսի ուժգնությամբ, որը հիմա մենք չենք կարող պատկերացնել: