Հարցազրույց Լոռու մարզի դատախազ Կարեն Շահբազյանի հետ

Հանցագործությունների բացահայտման ի՞նչ ցուցանիշներ են արձանագրվել Լոռու մարզի դատախազությունում 2011թ.-ի առաջին կիսամյակում:

Այս տարվա 1-ին կիսամյակում  մարզում արձանագրվել է հանցագործությունների  599 դեպք` նախորդ տարվա նույն ժամանակաշրջանի  768 դեպքի դիմաց: Մարզում  հանցագործությունները 169 դեպքով կամ 22 %–ով նվազել են: Արձանագրված հանցագործություններից  բացահայտվել է 573-ը: Կրկնակի` 86 հանցագործությունով նվազել են ծանր հանցագործությունները: 

Նախորդ տարվա 171 ծանր հանցագործությունների դիմաց այս տարվա առաջին կիսամյակում գրանցվել է 85 ծանր հացագործություն:  Հանցագործության ընդհանուր նվազման պայմաններում աճել են միջին ծանրության հանցագործությունները:  Արձանագրվել է 156 միջին ծանության հանցագործություն` նախորդ տարվա 147–ի  դիմաց:

Երկու դեպքով  աճել են առանձնապես ծանր հանցագործությունները: Մարզում արձանագրվել է սպանության 2 դեպք: Առանձնապես աճ է արձանագրվել սեփականության դեմ ուղղված  հանցագործություններով:

Ինձ շատ մտահոգում է  մարզում տրանսպորտային  միջոցների հափշտակության դեպքերը: Կիսամյակում արձանագրվել է ավտոմեքենաների հափշտակության 7 դեպք: Երկու օր առաջ ևս մեկ ավտոմեքենա էին առևանգել: Հիմնականում առևանգում են 10-15 տարվա արտադրության ավտոմեքենաներ: Առևանգելուց  հետո  ավտոմեքենայի գազի բալոնը և մարտկոցը հանում են, ավտոմեքենան գցում են մի կողմ:

Մարզում շատացել են նաև գողության այլ դեպքերը: Գրանցվել է բռնաբարության մեկ, թմրամիջոցների ապօրինի շրջանառության 40 դեպք: Լոռու մարզում մեծ տարածում է ստացել բենզինի օգտագործմամբ թմրամիջոց պատրաստելը և գործածելը: Դրա դեմ մեր կողմից տարվում է պայքար:

Ի՞նչ կասեք չբացահայտված հանցագործությունների մասին:

 Այդ թիվը առանձին հանցատեսակներով  ունենք, սակայն մեր կողմից հայտնաբերվել է 44 զենք-զինամթերք: Կամովին հանձնումներ ունենք այդ աշխատանքների ընթացքում: Իհարկե, ցուցանիշները գոհացուցիչ են, բայց նաև շատ խնդիրներ ունենք:

Ո՞րն է Ձեր ղեկավարած համակարգում առկա ամենաբարդ խնդիրը: 

Լավ մասնագետների խնդիր ունենք: Իսկ հանցատեսակներից, ես շեշտեցի, մեզ մտահոգում է գողության  եղանակով կատարվող  հանցագործությունները, որը կապված է բնակչության սոցիալական վիճակի հետ, և հիմնական պատճառն այն է, որ մարդիկ առանց հսկողության են թողնում իրենց գույքը: Դուռը  փակում են, մեկնում արտերկիր` հանգստանալու  կամ աշխատելու` չունենալով ընդհուպ դռան կարգին փականներ: Դա պայմաններ է ստեղծում հանցավոր տարրերի կողմից հափշտակություններ կատարելու համար:  Համաներումը կիրառելուց հետո գողության հանցատեսակները մի քիչ շատացան:

Մանկապղծության մեջ մեղադրվող Ախթալայի «Մեթըլ Փրինս» կորպորացիայի նախագահ Սերոբ Տեր–Պողոսյանի հանցագործության մասին, որպես մարզի դատախազ, ե՞րբ եք տեղեկացել:

Մինչ Սերոբ Տեր-Պողոսյանի  ձերբակալությունը մանկապղծության նրա արարքի մասին տեղեկություն չեմ  ունեցել, այլ դեպքում, անկասկած, դա կստանար իր պարզաբանումը:

Դատախազության կողմից որևէ ընթացք տրվե՞լ է Թեղուտի վառելափայտի յուրացումների և Ջիլիզայի զանգվածային ծառահատումների ահազանգերին:

«Կարաստ» ՍՊԸ-ի կողմից Թեղուտի վառելափայտի յուրացումների հետ կապված  քրեական գործ է հարուցվել: Փորձաքննություն է նշանակվել: Գումարը`5 մլն 697 հազար դրամը, ամբողջությամբ վերականգնված է: Գործը` մեղադրական եզրակացությամբ, ուղարկվելու է դատարան: Քրեական գործում մեղադրանք է առաջադրված «Լալավար անտառտնտեսության» տնօրենի և «Կարաստ»ՍՊԸ-ի նախագահ Կամո Շահնազարյանի և ՍՊԸ-ի պահեստապետի դեմ:

Ջիլիզայի անտառների զանգվածային հատումների շուրջ մտահոգությունները ես հասկացել եմ: Դրանց հետ կապված ես հանձնարարականներ եմ ուղարկել ոչ միայն ոստիկանությանը, այլ մարզի բնապահպանական տեսչությանը:  Այդ հրապարակումների հետ կապված մեր կատարած աշխատանքների ընթացքի մասին  մենք տեղեկատվությունը ուղարկելու ենք ՀՀ գլխավոր դատախազության, որտեղից դուք կարող եք ստանալ Ձեզ անհրաժեշտ տեղեկատվությունը:

«Հետքը» նաև ահազանգել էր Լոռու մարզի Շնողի գյուղապետ Հայկազ Քոչինյանի կողմից համայնքի բյուջեի 252 մլն դրամի կասկածելի ծախսումների մասին:

Սա նույնպես այն դեպքերից է, որ փորձաքննության պատճառով հոդվածի փաստերի հետ կապված քրեական գործի հարուցումը ձգձգվում է:  Շնողի գյուղապետ Հայկազ Քոչինյանի հետ կապված գործը դեռ ընթացքի մեջ է: