Տեսանյութեր
Լուսանկարներ
Կաթողիկոսը շնորհավորել է կանանց
Մարտի 8-ի առիթով Մայր Աթոռ Սուրբ Էջմիածնից Հայրապետական օրհնությունն է հղել և շնորհավորել «մեծազնիվ տիկնանց և օրիորդաց» Ն.Ս.Օ.Տ.Տ. Գարեգին Բ-ն.
«Ազգային մեր կյանքն այսօր նույնպես արդյունավորվում և զորանում է այն մեծ ավանդով, որ բերում են կանայք մատաղ սերնդի դաստիարակության և ինքնության կերտման, ընտանիքի ամրության պահպանման աստվածահաճո առաքելությամբ: Մեր դժվարին պատմության ճանապարհին հայ մայրերը, քույրերն ու դուստրերը օրհնյալ ջանք ու նվիրում են ներդրել` հանուն մեր ժողովրդի բարօր ու լուսավոր գալիքի:
Մեր մաղթանքն է, որ կանայք մշտարթուն նույն նվիրումով, արիական ոգով, քաջառողջ և եռանդաշատ շարունակեն իրենց սուրբ գործը, և Բարին Աստված տոնական այս օրը երկնառաք շնորհներով ուրախություն ու լուսավորություն բերի տիկնանց և օրիորդաց սրտերին ու հոգիներին` զորացնելով հույսի ու սիրո մեջ:
Աղոթքով առ Աստված հայցում ենք Բարձրյալի ամենազոր Աջի պահպանությունը սիրելի մեր մայրերին, քույրերին ու դուստրերին` ի խնդիր աստվածասեր մեր ժողովրդի և հայրենական մեր կյանքի առաջընթացի և զորացման:
Մեր Տեր Հիսուս Քրիստոսի շնորհները թող լինեն ամենքիդ հետ. Ամեն»-ասված է շնորհավորական ուղերձում:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել