Չախալյանների շահերի պաշտպան Ստեփան Ոսկանյանին արգելել են տեսակցել Թբիլիսիի մեկուսարանում գտնվող «Միասնական Ջավախքի» ղեկավար Վահագն Չախալյանին: Պատճառաբանությունը եղել է այն, թե` իբր 2008թ-ի սեպտեմբերի 5-ի` Ստեփան Ոսկանյանին Չախալյանների գործում ընդգրկվելու Վրաստանի արդարադատության նախարարության որոշումը  արդեն կորցրել է ուժը, քանի որ իրենք ԱՆ կազմից դուրս են եկել և մտել են Իրավական խորհրդատվության և իրավական պատիժների նախարարության կազմի մեջ: Մոտ 3 ժամ փաստաբանը փորձել է բանակցել, մինչև նրան ընդունել է մեկուսարանի պետի տեղակալը: Վերջինս կրկին բացատրել է, որ այդ որոշումը արդեն ուժ չունի, և թույլ է տվել Ստեփան Ոսկանյանին վերջին անգամ տեսակցել Վահագն Չախալյանին` զգուշացնելով, որ հաջորդ անգամ այլևս թույլ չեն տա: Մարտի 11-ին նշանակված է Չախալյանների դատավարությունը: Սակայն Ստեփան Ոսկանյանը մտավախություն ունի, որ իրեն թույլ չեն տա մասնակցել նաև դատավարությանը: Այդ կապակցության Ստեփան Ոսկանյանը դիմում է ուղարկել Վրաստանի ՄԻ պաշտպանին: «Եթե ինձ էլ չթողնեն դատավարությանը մասնակցել, այդ դեպքում Վահագն, Ռուբեն և Արմեն Չախալյանները պարզապես պետք է հրաժարվեն նաև վրացի պաշտպանի ծառայություններից և պահանջեն պարտադիր մեր մասնակցությունը: Այդ պահին, փաստորեն, նրանք որևէ փաստաբան չեն ունենա ու տեղեկատվական և իրավական բլոկադայի պայմաններում,  հնարավոր է, որ ցանկացած իրավական ակտ կամ նույնիսկ դատավճիռ կայացվի Չախալյանների նկատմամբ»,-Հետքի հետ զրույցում նշեց Ստեփան Ոսկանյանը: Ստեփան Ոսկանյանին` Չախալյանների գործում ներգրավվելու Վրաստանի ԱՆ որոշումը  որևէ ժամկետ չէր սահմանում և մինչև դատաքննության ավարտը փաստաբանը պետք է իրականացներ Չախալյանների պաշտպանությունը: «Այն պատճառաբանությունը, որ ԱՆ նախարարությունը իրավասու չէ նման հարցեր քննարկել, որևէ հիմնավորում չունի, մանավանդ որ այդ նախարարությունը վերջերս Պատրիկ Արապյանին արտոնագիր չտալու հրաման էր արձակել: Այսինքն` այդ իրավական հարցերով նրանք դեռ զբաղվում են: Պարզապես փորձում են ավելրոդ խոչընդոտներ առաջացնել»,-ասաց Ստեփան Ոսկանյանը: Պատրիկ Արապյանի մերժման փաստը պաշտպանական կողմը որոշել է բողոքարկել դատարանում: Փաստաբանը նաև տեղեկացրեց, որ փետրվարի 2-ին Վրաստանի վերաինտեգրման հարցերով փոխնախարար  Ելենա Թևդորաձեն այցելել է Վ. Չախալյանին: Նա ասել է, որ ազդվել է Վ. Չախալյանի` դատարանում արած այտարարությունից, փորձել է մանրամասներ ճշտել գործի վերաբերյալ, և նույնիսկ խոսել են հայ-վրացական համատեղ համալսարան ստեծելու հարցի շուրջ: Փաստաբանի խոսքերով, Վահագնի վիճակը նորմալ է, ավելին` այս անգամ Ս. Ոսկանյանը իր պաշտպանյալին կարողացել է փոխանցել Աղոթագիրքը և վրացերեն լեզվի զրուցարան: