Արմեն Հարությունյանը չի ուզում դառնալ «քաղաքական պայքարի կողմերից մեկի մաս»
Մարդու իրավունքների պաշտպանի գրասենյակն այսօր պատվոգրեր հանձնեց հանդուրժողության մշակույթի տարածման գործում առավել զգալի ներդրում ունեցող մեկ քաղաքական գործչի եւ լրագրողի:
Մարդու իրավունքների պաշտպան Արմեն Հարությունյանն իր ելույթից հետո ասաց, որ մրցանակը շնորհվում է խրախուսելու համար հանդուրժողության միջավայրի ձեւավորումը :
Լրագրության ոլորտում մրցանակի ստացավ «Առավոտ» օրաթերթի լրագրող Աննա Իսրայելյանը, քանի որ «նա ոչ մեկի ջրաղացին ջուր չի լցնում»: Քաղաքական գործիչներից էլ մրցանակը ստացել է «Ժառանգություն» խմբակցության քարտուղար Լարիսա Ալավերդյանը:
Արմեն Հարությունյանին լրագրողները հարցրել են, թե վարչապետ Տիգրան Սարգսյանը մարտի 5-ի ելույթում խոսելով անհանդուրժողության մթնոլորտից բխող նոր սպանությունների վտանգի մասին, չի կատարել արդյոք սպանությունների կանխատեսում: Արմեն Հարությունյանը պատասխանել է.«Կարծում եմ պարզապես հաջող ձեւակերպումներ չէին: Խոսքը նրա մասին է, որ օր առաջ հասկանանք, որ հանդուրժողականությունը լինի մեր մշակույթի մասը»:
Հաջորդ հարցով էլ լրագրողները փորձեցին ճշտել, թե օմբուդսմենը ինչ կարգավիճակ կտա քաղաքացիներին, ովքեր դատախազության ու հատուկ քննչական ծառայության ռեպրեսիայի գործիք են դարձել, արդյոք նրանք քաղբանտարկյալ չեն: Ա. Հարությունյանը պատասխանել է, որ ինքը մարդկանց չի գնահատում, ինքը ինստիտուտներն է գնահատում. «Ես քաղբանտարկյալ բառը չեմ ասել, չեմ էլ ասելու, քանի որ կդառնամ քաղաքական պայքարի կողմերից մեկի մաս»:
Արմեն Հարությունյանը ուզում է օբյեկտիվ լինել, նույնիսկ անկախ Եվրախորհուրդի դիրքորոշումից, որ մի անգամ ասում է քաղբանտարկյալ, մեկ էլ չի ասում:
Լրագրողներին հետաքրքրում էր նաեւ, թե օմբուդսմենի գործունեությունից ով է ավելի գոհ կամ դժգոհ` ընդդիմությունը, իշխանությունը, թե հասարակությունը. «Կրակն ենք ընկել թե իշխանության, թե ընդդիմության ձեռքին, անհանդուրժողականության առումով: Եթե մեր տեսակետը համընկնում է ընդդիմության հետ, ապա դու ընդդիմության համար լավ ես, իսկ իշխանության տեսանկյունից` դրսի համար աշխատող մարդ»:
Ա. Հարությունյանը ասում է, որ երկու կողմերն էլ նույն քաղաքական համակարգի մաս են եւ պետք է հանդուրժող լինեն:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել