ՀՀ արտակարգ իրավիճակների նախարարության Հայաստանի փրկարար ծառայությունից տեղեկացնում են ուժեղ քամիների պատճառած վնասների մասին: Լոռու մարզում մարտի 9-ին գրանցված ուժեղ քամու հետեւանքով վնասվել են Սարամեջ համայնքի մի շարք բնակելի տների տանիքների ծածկերը, կոտրվել լուսամուտների ապակիները: Կոտայքի մարզից տեղեկություն է ստացվել, որ նույն օրը, ժամը 15.00-ից մինչև ժամը 15.30-ը գրանցված ուժեղ քամու հետեւանքով վնասվել է Գառնի համայնքի բնակիչ Արայիկ Օհանյանին պատկանող տան տանիքի ծածկը` 230 քմ մակերեսով եւ փլուզվել տանիքը կրող եռանկյունաձեւ պատը: Վայոց ձորի մարզում նույն օրը գրանցված ուժեղ քամին մեծ վնաս է հասցրել մարզի Ելփին եւ Խաչիկ համայնքների բնակելի տներին: Գեղարքունիքի մարզում էլ մարտի 10-ին, ժամը 03.00-ի սահմաններում գրանցված ուժեղ քամու հետեւանքով վնասվել է Ակունք համայնքի բնակիչ Մելիք Ոսկանյանին պատկանող տան տանիքի ծածկը` 40 քմ մակերեսով: Համապատասխանաբար` Լոռու, Կոտայքի, Վայոց ձորի եւ Գեղարքունիքի մարզպետարաններում ստեղծվել են հանձնաժողովներ` վնասի չափերը ճշտելու համար: