Չնայած տնտեսական մրցակցության պաշտպանության հանձնաժողովը գրեթե ամեն օր հայտարարում է, որ առաջին անհրաժեշտության ապրանքների գները արհեստականորեն չեն բարձրանալու, Կապանում իրավիճակն այլ է: Մասնավորապես, քաղաքի խանութներում 1 կգ շաքարավազն արժե 300-320 դրամ, 1լ ձեթը` 700-720 դրամ, 200-230 դրամով թանկացել է նաեւ կարագը:

Ինչպես նշեցին մանրածախ առևտրի կետերի աշխատակիցները, «լողացող» փոխարժեքի քաղաքականությունից հետո կոնկրետ երշիկեղեն արտադրող մայրաքաղաքի ընկերություններից մեկը ապրանք է առաջարկել` բարձր գներով ու առանց որևէ փաստաթղթի: «Պահանջում ենք փաստաթուղթը, ասում են` հետո կտանք, մեկ շաբաթից, բայց հո հարկայինն էլ չի սպասում մեկ շաբաթ»,- «Հետքի» Կապանի թղթակցի հետ զրույցում նշել են խանութների աշխատակիցները: Տվյալ պարագայում վերջիններս հրաժարվում են ապրանքներ վերցնելուց: Հայաստանի Հանրապետության տնտեսական մրցակցության պաշտպանության պետական հանձնաժողովի մամուլի քարտուղար Արմինե Ուդումյանը մեզ հետ ունեցած հեռախոսազրույցում ասաց, որ ապրանքաշրջանառության դեպքում փաստաթղթեր չապահովելն օրենքի խախտում է եւ տնտեսվարողները կարող են դիմել համապատասխան ատյանների: «Տնտեսվարողները պետք է տեղյակ լինեն, որ փոխվել  է գործող կարգը ու այսուհետ փաստաթղթային շրջանառությունը պարտադիր է: Այն կազմակերպությունները կամ ընկերությունները, որոնք հրաժարվում են  հաշիվ-ապրանքագին տրամադրելուց, տնտեսվարողները կարող են կամ դիմել հանձնաժողով, կամ  Պետական եկամուտների նախարարությանը»,-նշեց Ա. Ուդումյանը: Ինչ վերաբերում է առաջին անհրաժեշտության ապրանքատեսկաների գների արհեսատական բարձրացմանը, ապա ըստ Ա. Ուդումյանի,  մարզերում պատկերը մի քիչ մտահոգիչ է: «Մարզերում շաքարավազը, կարագը, ձեթը եւ այլ ապրանքատեսակներ իրացվում են վաելի բարձր գներով, քան Երեւանում, ուստի չհիմնավորված գների բարձրացումը կանխելու նպատակով հանձնաժողովը դիմել է Պետական եկամուտների կոմիտե»,-ավելացրեց Ուդումյանը: