Օդի համար վճարվող գումարը կներառվի տոմսի գնի մեջ
Ֆինանսների նախարար Տիգրան Դավթյանն այսօր Կառավարության նիստի ժամանակ քննարկման ներկայացրեց «ՀՀ օդային ուղեւորների ելքի համար պետական տուրքի գանձման կարգի» մասին որոշման նախագիծը:
ԱԺ-ն ընդունել էր «Պետական տուրքի մասին» օրենքում փոփոխություն եւ լրացում կատարելու մասին օրենքը: Ըստ այդմ նախատեսվում է կատարել փոփոխություններ օդի տուրքի վճարման ընթացակարգում` այն ներառելով տոմսի արժեքի մեջ:
Կառավարությանը ներկայացված կարգը հստակեցնում է ընթացակարգերը փոփոխությունը կատարելու համար. «Մասնավորապես պետական տուրքի գանձումը պատվիրակվում է ՀՀ-ի ավիափոխադրողներին, որոնց մեջ ներառվում են նաեւ ՀՀ-ում ներկայացուցչություններ ունեցող, կանոնավոր օդային փոխադրումներ կատարող օդային ավիափոխադրողները»,- ասաց Տ. Դավթյանը:
Ոչ կանոնավոր ավիափոխադրումներ կատարողների պարագայում պետական տուրքի գանձումը կապահովի օդանավակայանը շահագործող կազմակերպությունը: «Անցումային շրջանը կտեւվի մոտ մեկ տարի, իսկ այն տոմսերի համար, որոնք վաճառվել են մինչեւ կարգի` ուժի մեջ մտնելը, կկիրառվի նախորդ ձեւաչափը, մինչեւ 2010թ մարտի 29-ը»,- տեղեկացրեց նախարարը:
Նա նշեց, որ կարգը հստակեցնում եւ պարզեցնում է օրենքի փոփոխությունը գործընթացի առումով: Նախարարը վարչապետից երկու-երեք օր ժամանակ խնդրեց Արդարադատության նախարարության հետ իրավական ձեւակերպումները հստակեցնելու համար:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել