Այսօր «Ժառանգություն» խմբակցության ղեկավար Արմեն Մարտիրոսյանն անդրադարձավ վերջերս շրջանառվող այն լուրերին, թե վարչապես Տիգրան Սարգսյանը պատրաստվում է հրաժարական տալ: «Երեկ Տիգրան Սարգսյանը մեր խմբակցության անդամների հետ հանդիպման ժամանակ ասաց, որ այդ լուրերը ստահոդ են, բայց ես կարծում եմ` հին հայկական ասացվածքը, թե «ծուխն առանց կրակ չի լինում», ուժի մեջ է»,- ասաց նա: Այնուամենայնիվ, Արմեն Մարտիրոսյանը չտվեց վարչապետի մեկ այլ թեկնածուի անուն, ով կարող էր նպաստել երկրում տնտեսական ճգնաժամի դեմ ավելի արդյունավետ պայքարին, քանի որ «զուտ անձերի փոփոխությամբ խնդիրը չի լուծվի»: «Նույնիսկ եթե այսօր Արմեն Մարտիրոսյանը լինի վարչապետ, օլիգարխիկ, կրիմինալ այս տնտեսական համակարգում ինչ պետք է անի, ոչինչ, դրա համար էլ մենք ոչ թե ուղղակի պնդում ենք փոփոխություններ հանուն իշխանափոխության, այլ մեզ համար կարևորը համակարգային բարեփոխումներն են»,- ասաց Արմեն Մարտիրոսյանը: Ըստ նրա`այն քայլերը, որոնք ձեռնարկվում են կառավարության կողմից, բավարար չեն. «Մինչև այդ համակարգը չապամոնտաժես, դու չես կարողանա իրական պայքար մղել ճգնաժամի դեմ»: