Ղարաբաղում գրանցված են 18 մարզական ֆեդերացիաներ, որոնք մինչեւ այս տարի ֆինանսական ոչ մի օժանդակություն չէին ստանում պետությունից: Ինչպես ընդունված է, ֆեդերացիայի նախագահ էր ընտրվում կամ գործարարներից, կամ էլ պաշտոնատար այրերից, որոնց միջոցների հաշվին էլ փորձում էին ինչ-որ մարզական միջոցառումներ անցկացնել: Եվ ահա, այս տարի առաջին անգամ որոշվեց պետական բյուջեից նրանց ֆինանսական աջակցություն ցուցաբերել: ԼՂՀ սպորտի պետական կոմիտեի նախագահ Ռազմիկ Հովսեփյանը «Ազատ Արցախ» թերթին տված հարցազրույցում նշել է, որ որոշումը նպատակաուղղված է ֆեդերացիաների միջոցով ԼՂՀ միջազգային ճանաչմանը, սպորտի բնագավառում հանրապետության վարկանիշի բարձրացմանը եւ հեղինակության ամրապնդմանը, ինչպես նաեւ բնակչության շրջանում առողջ ապրելակերպի ձեւավորմանը եւ առողջ սերնդի դաստիարակությանը: 18 մարզական ֆեդերացիաներից 14-ն այս տարի ֆինանսավորվում է պետական բյուջեից, որոնց հատկացված ընդհանուր գումարը կազմում է 28 միլիոն 500 հազար դրամ: Պետբյուջեից հատկացումները կուղղվեն կարեւոր մարզական միջոցառումների կազմակերպմանը: Մեր այն հարցին, թե ինչու 18 մարզական ֆեդերացիաներից 14-ն են ֆինանսավորվում, Ռազմիկ Հովսեփյանը պատասխանեց, թե մյուս ֆեդերացիաները չեն գործում, չկան համապատասխան խմբեր եւ մարզիչներ, այդ պատճառով էլ գումարը բաշխվել է 14 գործող ֆեդերացիաների միջեւ: