Լոռու մարզի դատախազության կողմից հարուցվել է քրեական գործ՝ Հոբարձի համայնքում բնակիչների անվամբ՝ որպես սոցիալական օգնություն, դուրս գրված գումարները հափշտակելու դեպքի առթիվ: Այս մասին հայտնում է գլխավոր դատախազության մամլո գրասենյակը: Պարզվել է, որ Մ. Ղարաջյանը,  2002-2008 թթ. հանդիսանալով Հոբարձի համայնքի ղեկավար, օգտագործելով իր պաշտոնական դիրքը, 2005-2008 թթ ընթացքում՝ որպես սոցիալական օգնություն, համայնքի բյուջեից դուրս գրված եւ իր վստահությանը հանձնված գումարներից յուրացման միջոցով հափշտակել է շուրջ 560 հազար դրամ: Հարուցված քրեական գործն ուղարկվել է ոստիկանության Լոռու մարզի քննչական բաժին՝ նախաքննություն կատարելու: