Այսօր Մարդու իրավունքների պաշտպանի գրասենյակը, ՄԱԿ-ի Զարգացման ծրագրի հայաստանյան գրասենյակը և Շվեդիայի Ռաուլ Վալենբերգի անվան Մարդու իրավունքների և մարդասիրական իրավունքի ինստիտուտը պաշտոնապես բացեցին   ՄԻՊ-ի գրադարանը և ներկայացրեցին «Տնտեսական, սոցիալական և մշակութային իրավունքներ» հայերենով  թարգմանված դասագիրքը: Այս նախաձեռնություններն իրականացվել են ՄԱԶԾ-ի «Մարդու իրավունքների պաշտպանի գրասենյակի կարողությունների հզորացում» ծրագրի շրջանականերում` Շվեդիայի Միջազգային զարգացման համագործակցության գործակալության  ֆինանսական աջակցությամբ: Բացմանը ներկա էին դատական համակարգի, ազգային գրադարանների, գիտական հաստատությունների, համալսարանների, ինչպես նաև միջազգային և հասարակական կազմակերպությունների ու լրատվամիջոցների ներկայացուցիչներ: Մարդու իրավունքների պաշտպան Արմեն Հարությունյանը ասաց. «Մարդու իրավունքներն առաջին հերթին մշակույթ են, կրթություն, ապրելաձև, մտածելակերպ և հետո նոր մնացածը: Նմանատիպ նախաձեռնությունները նպաստում են մարդու ներքին արժեքային համակարգի ձևավորմանը»: ՄԱԿ-ի մշտական համակարգող ,  ՄԱԶԾ մշտական ներկայացուցիչ տկն. Կոնսուելո Վիդալն   վստահություն հայտնեց, որ «Տնտեսական, սոցիալական և մշակութային իրավունքներ» դասագիրքն օգտակար կլինի և հաջողությամբ կծառայի մարդու իրավունքների պաշտպանության ոլորտում գործունեություն ծավալող անձանց համար, որպիսիք են ՄԻՊ-ի աշխատակազմը, իրավաբանական ֆակուլտետների ուսանողները, գիտական հաստատություններն ու հասարակական կազմակերպությունները` մարդու իրավունքների հիմնարար սկզբունքներին առավել տեղեկացված լինելու և մասնագիտական գործունեություն ծավալելու նպատակով: ՄԱԶԾ-ի «Մարդու իրավունքների պաշտպանի գրասենյակի կարողությունների հզորացում» ծրագրի շրջանակներում իրականացվող այլ միջոցառումների շարքում, ծրագիրն աջակցում է նաև ՄԻՊ-ի գրասենյակին բարձրացնելու մարդու իրավունքների վերաբերյալ իրազեկումը եռամսյակային տեղեկագրերի մշակման ու հրատարակման, զեկույցների տպագրման  և այլ ուսումնական ծրագրերի ու սեմինարների կազմակերպման միջոցով: