ՀՀ արդարադատության նախարարության «Էրեբունի» քրեակատարողական հիմնարկի 3-րդ մասնաշենքի ձեռնահարկում 2009 թվականի մարտի 18-ին՝ ժամը 19-ի սահմաններում, հայտնաբերվել է դատապարտյալ Արմեն Վազգենի Խաչատրյանի դիակը՝  կախված վիճակում: ՀՀ գլխավոր դատախազության մամուլի ծառայությունը տեղեկացնում է, որ Ա.Խաչատրյանը  դատապարտվել է 05.09.07թ. Շենգավիթ համայնքի առաջին ատյանի դատարանի կողմից ՀՀ քրեական օրենսգրքի 327-րդ հոդվածի 1-ին մասով (զինծառայությունից խուսափելու համար)՝ 2 տարի 6 ամիս ժամանակով: Դիակի զննմամբ բռնության հետքեր չեն հայտնաբերվել: Երրորդ մասնաշենքում, որտեղ պատիժ է կրել Ա.Խաչատրյանը, պատիժը կրելու համար հիմնականում պահվել են «Եհովայի վկաներ» կրոնական կազմակերպությանը հարող դատապարտյալները.  Ա.Խաչատրյանը նույնպես հարել է այդ կազմակերպությանը: Հիմնարկի ղեկավարությունը երկու ամիսը մեկ անգամ թույլատրում է նշված կրոնական կազմակերպության ղեկավարությանը՝ այցելել քրեակատարողական հիմնարկ՝ տեսակցելու եւ առանձնազրույց ունենալու նշված հիմնարկում պատիժը կրող՝ «Եհովայի վկա» կազմակերպությանը հարող թվով 65 դատապարտյալների հետ: Վերջին այցելությունը տեղի է ունեցել  2009 թվականի մարտի 14-ին: ՀՀ ոստիկանության Էրեբունի քննչական բաժնում հարուցվել է քրեական գործ՝ ՀՀ քրեական օրենսգրքի 110-րդ հոդվածի առաջին մասով, կատարվում է նախաքննություն: Դեպքի վայրում հայտնաբերվել է ձեռագիր  երկտող, որը, հսկողություն իրականացնող դատախազի հանձնարարությամբ, դարձել է քննության առարկա: