Երեւանի Կենտրոն եւ Նորք-Մարաշ վարչական շրջանների ընդհանուր իրավասության դատարանը երեկ բավարարել է նախաքննական մարմնի միջնորդությունն ու Հայ ազգային կոնգրեսի՝ օգոստոսի 9-ին ձերբակալված 7 ակտիվիստներից երեքի՝ Տիգրան Առաքելյանի, Արտակ Կարապետյանի եւ Սարգիս Գեւորգյանի նկատմամբ որպես խափանման միջոց է կիրառել երկամսյա կալանքը: Չորրորդ ակտիվիստին՝ Վահագն Գեւորգյանին, որը եւս տարվել էր դատարան, դատավոր Մնացական Մարտիրոսյանն ազատ է արձակել: Նա եւ Կոնգրեսի՝ ժամանակավոր պահման վայրում գտնվող մյուս երեք ակտիվիստները՝ Սահակ Մուրադյանը, Արեգ Գեւորգյանն ու Դավիթ Քիրամիջյանը, ազատ են արձակվել ստորագրության դիմաց: 

Վերջին երեքը ԺՊՎ-ից ազատ արձակվելուց հետո միացել են երիտասարդներին անհապաղ ազատ արձակելու պահանջով դատարանի շենքի դիմաց հավաքված քաղաքացիներին ու ՀԱԿ համակիրներին: Մինչ դատարանում ձերբակալվածների հարցն էր քննարկվում, դատարանի մոտ շտապօգնության երկու մեքենա էր ժամանել՝ մեկը դատարանի դիմաց հավաքվածներից մեկին, մյուսը՝ դատարանի ներսում Տիգրան Առաքելյանին բուժօգնություն ցուցաբերելու համար: