Այսօր Հայելի ակումբում պատգամավոր Տիգրան Թորոսյանն անդրադարձավ Հանրային խորհրդի ստեղծմանը: Նա ցավով նշեց, որ «մենք ժամանակ առ ժամանակ ինչ-որ մի տեղ ինչ-որ մի բան տեսնում ենք, հետո մտածում ենք, որ ճիշտ կլինի դա բերել մեր երկիր, եւ մեր երկրում դա կգործի, բայց դրա համար հարկավոր են նախադրյալներ: Ես Վազգեն Մանուկյանին չեմ քննադատում եւ Հանրային խորհրդի առաջին տասներկուսի մեջ մարդիկ կան, որոնց անկեղծ հարգանքով եմ վերաբերում, չեմ ուզում խորհուրդը գնահատել անձերի մակարդակով»: Հանրային խորհրդի գործունեության համար, ըստ Տ. Թորոսյանի, կան սահմանադրական խնդիրներ: «Որեւէ մեկը կարո՞ղ է նկարագրել, թե Սահմանադրության մեջ որտեղ է տեղավորվելու այդ Հանրային խորհուրդը: Դա հնարավոր չէ անել»: Տիգրան Թորոսյանը ասաց, որ Կառավարությանն առընթեր էլ խորհուրդներ կան, օրինակ` Գործարարությանն աջակցող խորհուրդը, «բայց սրանից գործարարության ոլորտը չի փոխվում»: Տ. Թորոսյանը Հանրային խորհրդի ստեղծումից ոչ մի ակնկալիք չունի. «Կարծում եմ` ուղղակի փոքր շփոթություն կստեղծի, բայց եթե հաջողություն ունենան, ուրախ կլինեմ»: Բանախոսը համոզված է, որ յուրաքանչյուր հաջողություն պետք է ունենա իր իրավական հիմքերը, հակառակ դեպքում «այն կլինի լավ ցանկություն, բայց ոչ որեւէ արդյունք»: