«Հրազդան» տոնավաճառի աշխատակիցները շարունակում են գործադուլը
Այսօր «Հրազդան» տոնավաճառի աշխատակիցները երեկ սկսված գործադուլը շարունակեցին Կառավարության շենքի դիմաց:
Նրանք պահանջում են 50 %-ով իջեցնել տաղավարների վարձավճարները՝ հասցնելով մինչեւ 100 հազար դրամի, այսօրվա ամսեկան 225 հազար դրամ վարձավճարի փոխարեն:
«Տեղի գները շատ բարձր են, հնարավոր չէ նման ձեւով աշխատել: Եթե մեր ուզած պատասխանը չտան, չենք աշխատելու»,- ասում է վաճառական Գեւորգը: Նա միակն էր, ով համաձայնեց հրապարակել իր անունը: «Մարդիկ վախենում են անուն տալ, որովհետեւ շուկայի տնօրինությունը կզրկի տաղավարից»,-ասում է Գեւորգը:
Հավաքված բազմության բողոքներին պատասխանելու համար Կառավարության քաղաքացիների ընդունելության եւ դիմում-բողոքների քննարկման վարչության պետ Ալեքսանդր Ղազարյանը երկու օր ժամանակ խնդրեց: Նա նշեց, սակայն, որ «Հրազդան» տոնավաճառի տարածքը մասնավոր սեփականություն է, եւ կառավարությունը կարող է հանդես գալ որպես միջնորդ:
«Տելեէկրանից աշխատատեղերի մասին են մտածում, բայց պատրաստի աշխատատեղերը փակում են»,- բողոքեց վաճառականներից մեկը:
«Եթե օրենքով մեր տեղի վարձավճարը կապվում է մեր շրջանառության հետ, թող ըստ այդմ էլ մեզանից գումար գանձեն ու վերջ, պահպանեն օրենքը, եթե օրենքը կա, ինչու՞ նման ձեւով չեն վարվում, եթե շրջանառություն չկա, ի՞նչ մուծեմ»,- հարցրեց մեկ ուրիշը:
Վաճառականները տեղեկացրեցին, որ բողոքի ակցիան կշարունակեն վաղը:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել