Ֆինանսական տարվա առաջին եռամսյակն արդեն վերջանում է, բայց Արմավիրի մարզի մի շարք գյուղական համայնքներում դեռ պահպանվում են նախորդ տարիներից կուտակած աշխատավարձերի պարտքերը: Արմավիրի մարզպետարանի աշխատակազմի ղեկավար Փառանձեմ Կարապետյանի փոխանցմամբ` տարին մեկնարկել են շուրջ 324 մլն. դրամ պարտքով, որից 235-ը  1996-2006թթ.կուտակում է: Թեև վերջին երկու տարիներին որոշ գյուղական համայնքներ կարողացել են  135 մլն. դրամի պարտքը մարել, բայց 20 համայնքներ էլ դեռ կան, որ չեն կարողանում ձերբազատվել դրանից: Աշխատակազմի ղեկավարի ասելով` պարտքերը կուտակվել են հիմնականում համայնքների ղեկավարների կողմից տեղական բյուջեն սխալ պլանավորելու կամ, եկամուտների կատարման բարձր մակարդակ չապահովելու պատճառով: Առանձին դեպքերում էլ դրանք ուռճացած թվաքանակով հաստիքներ ստեղծելու գյուղապետերի ոչ պրոֆեսիոնալ մոտեցման արդյունք են: Այս, ինչպես նաև աշխատավարձերի պլանավորման գործում համայնքների ղեկավարների սիրողական վերաբերմունքի պատճառով ոչ միայն աշխատողները տարիներով աշխատավարձի երես չեն տեսել, այլև` փակվել են մի շարք մանկապարտեզներ ու երաժշտական դպրոցներ: Լեռնագոգի նախկին ղեկավարությունն օրինակ, պահպանելով հաստիքները, փակել է գյուղի միանգամից երկու մանկապարտեզները: Նախկին ավագանու անդամ Ռուբիկ Գևորգյանը մինչև հիմա զարմացած է, թե ինչու գյուղապետը փակված մանկապարտեզների աշխատողներին չազատեց աշխատանքից: «Աշխատողը տանը նստած աշխատավարձի էր սպասում, իսկ պարտքերը կուտակվում էին»,-ասաց  Ռ.Գեւորգյանը: Ռ.Գևորգյանի ասելով` սխալ էր բաշխվում նաև գյուղի երկու մանկապարտեզներին հատկացվող սննդի ծախը: Ըստ նրա` դրանցում գրեթե նույն թվով երեխաներ էին հաճախում, բայց դրանցից մեկին տրվող գումարը միշտ մի քանի անգամ գերազանցում էր մյուսին: Տարեցտարի կուտակված պարտքերը լուրջ խնդիրների առաջ են կանգնեցրել համայքների ներկայիս ղեկավարներին: Վերահաշվարկների արդյունքում նույնիսկ անիրական պարտքեր են հայտնաբերվել: Լեռնագոգի ղեկավար Սարգիս Մարգարյանն անիրական պարտքերի մասով հարցը տեղափոխել է իրավական հարթություն: Դատական երկարատև վեճերի արդյունքում վճիռ է կայացվել հօգուտ համայնքի գործող իշխանության. դատարանը հիմնավորել է դրա անիրական լինելը և պարտքը համարել վճարման ոչ ենթակա: Մի շարք համայնքներում էլ աշխատավարձեր չեն տրվել, որովհետև բյուջեներն են կալանքի տակ եղել: Լուկաշինում օրինակ էներգետիկներին ունեցած պարտքի պատճառով արգելանք էր դրվել համայնքի բյուջեի վրա: Չնայած հիմա կալանքը հանվել է, բայց աշխատավարձի մասով հարցը դեռ բաց է: Գյուղապետ Փանոս Խորոզյանը Լուկաշին համայնքն իր ճեղքված բյուջեով  ու ահռելի պարտքերով փոխանցել էր իր հաջորդին: Սա էլ գլուխ չէր հանել: Նոր գյուղապետի անկարողությունը Փ.Խորոզյանին նախկին պաշտոնին գալու հույսեր էր տվել: Օգտվելով դրանից, ինչպես նաև իր խնամու` ԱԺ պատգամավոր, ՄԱՊ-ի Ալիկ Պետրոսյանի հեղինակությունից, Խորոզյանը նախորդ տարի ետ բերեց գյուղապետի իր մանդատը: «Իր թողած պարտքերը ինքն էլ կմարի»,-նկատեց մարզպետարանի աշխատակազմի ղեկավարը: Վերջինս խոստովանեց, որ այսուհետ ստիպված են բյուջեները կազմելիս համայնքներին աջակցել ոչ միայն մեթոդապես, այլև` աշխատավարձերի պլանավորման , ինչպես նաև իրական թվակազմով հաստիքներ ձևավորելու հարցերում: Հայկուշ Ասլանյան