«Շատերը մտածում են, եթե բոլորը անում են, ես ինչու չանեմ կամ ինչ կփոխվի, եթե ես էլ անեմ ու սխալվում են, ինչպես իմ հեքիաթում պատահեց: Բոլորը առանց մտածելու կտրեցին անտառի բոլոր ծառերը ու պապիկը ճաղատացավ: Ամեն մարդ իրենից պետք է սկսի պահպանելն ու չոչնչացնելը»,- ասում է Արևորդի էկո-ակումբի սան Անի Մակարյանը: Նա «Արևի հետքերով» գրքի հեքիաթներից մեկի հեղինակն է: Այսօր Խնկո-Ապոր անվան գրադարանում տեղի ունեցավ «Արևի հետքերով» հեքիաթների գրքի շնորհանդեսը: «Արևի հետքերով» բնության մասին հեքիաթների գիրքը ստեղծվել է Հայաստանում բայրի բնության և մշակութային արժեքների պահպանման հիմնադրամի և ՎիվաՍել ՄՏՍ-ի հետ համատեղ իրականացվող «Պահպանիր բնությունը» քարոզարշավի շրջանակներում: Գիրքն առանձնահատուկ է նրանով, որ բոլոր հեքիաթների հեղինակները 11-16 տարեկան պատանիներն են հանրապետության տարբեր մարզերից: Երեխաներից երեխաներին հասցեագրված հեքիաթների այս գիրքը կոչված է ուշադիր և զգոն դարձնել տարեկիցներին բնության ու իրենց շրջապատող աշխարհի հանդեպ: Հեքիաթներում գլխավոր հերոսը բնությունն է` իր գեղեցկություններով, խնդիրներով, մարդու հետ հավերժական կռվով ու բարեկամությամբ: Գրքի նկարազարդումները ևս միջմարզային նկարչական մեծ մրցույթի մասնակից երեխաների աշխատանքներն են: Իսկ բոլոր նրանց համար, ովքեր դեռ կարդալ չգիտեն, ինչպես նաև նրանց համար, ովքեր ունեն սահմանափակ կարողություններ, հեքիաթների գիրքը կներկայանա audio տարբերակով: Փոքրիկ հեքիաթագիրները չեն մոռացել նաև իրենց հասակակիցների մասին, անավարտ են թողել որոշ հեքիաթներ` նրանց էլ հնարավորություն տալով շարունակել հեքիաթները: Լուրը տրամադրեց Հայաստանում վայրի բնության և մշակութային արժեքների պահպնման հիմնադրամը: