Շիրակի մարզի դատախազությունում հարուցվել է քրեական գործ՝ «Գյումրու ծննդատուն» ՊՓԲԸ տնօրենի կողմից պաշտոնեական դիրքը չարաշահելու դեպքի առթիվ: Այս մասին տեղեկացնում է Գլխավոր դատախազության մամլո ծառայությունը: Պարզվել է, որ Վարդան Սարգսյանը, 2006-2008 թթ., լինելով  «Գյումրու ծննդատուն» ՊՓԲԸ-ի տնօրեն, 2007թ. փետրվարից մինչեւ դեկտեմբերն ընկած ժամանակահատվածում կարգադրել է ընկերության գանձապահ Ա. Գրիգորյանին`  ընկերության ընդհանուր թվով 39 աշխատակցի՝ բուժքույրերի, մանկաբարձների եւ սանիտարների վճարել  սահմանված աշխատավարձից 7000 դրամ պակաս՝ աշխատանքից ազատված աշխատակիցներին նյութական օգնություն ցույց տալու պատճառաբանությամբ: Գանձապահ Ա. Գրիգորյանը, տնօրենի կարգադրությամբ, նշված ժամանակահատվածում սահմանված աշխատավարձից յուրաքանչյուր ամիս 7000 դրամ  պակաս է վճարել նշված աշխատակիցներին, որի արդյունքում գոյացած ընդհանուր գումարը՝  2 մլն 240 հազար դրամը,  յուրաքանչյուր ամիս մաս-մաս  հանձնել է տնօրեն Վ. Սարգսյանին: Փաստի առթիվ Շիրակի մարզի դատախազությունում  հարուցվել է քրեական գործ`պաշտոնական լիազորությունները չարաշահելու մեղադրանքով: Նշված քրեական գործը միացվել է Վ.Սարգսյանի կողմից գումար յուրացնելու եւ պաշտոնեական կեղծիք կատարելու համար ավելի վաղ հարուցված քրեական գործին: Պաշտոնեական կեղծիքի մեղադրանքով հարուցված քրեական գործի տվյալներով՝  Վ. Սարգսյանը 2007 թվականի մարտ-մայիս ամիսներին ծննդատանը բուժօգնություն ստացած Վրաստանի քաղաքացիներ Հ. Առաքելյանի, Լ. Սարգսյանի, Հ. Կարապետյանի հարազատներից, ընկերության  դրամարկղում մուծում կատարելու նպատակով վերցրել է  ընդհանուր գումարով 407 հազար 880 դրամ, սակայն ընկերության դրամարկղ չի մուծել: Օգտագործելով պաշտոնեական դիրքը՝ ՊՓԲԸ-ի տնօրենը հանձնարարել է Հ. Առաքելյանի, Լ. Սարգսյանի, Հ. Կարապետյանի ծննդաբերության տվյալները փոխել, դրանցում լրացնել ՀՀ քաղաքացու ակնհայտ կեղծ տվյալներ եւ դրանք վավերացնելով ընկերության կնիքով, նրանց ձեւակերպել  է որպես պետպատվերով բուժվող հիվանդներ, իսկ գումարը յուրացրել: Նշված երկու դեպքերով հարուցված քրեական գործերը կքննվեն մեկ վարույթում, որի նախաքննությունը հանձնարարվել է  ոստիկանության Շիրակի մարզի քննչական բաժնին: