Ղարաբաղցիները բողոքում են նաեւ ոստիկանությունից ու դատարաններից
2008թ. ընթացքում ԼՂՀ Մարդու իրավունքների պաշտպանի աշխատակազմում մուտքագրված շուրջ 196 դիմումներն ընդգրկում են հանրային կառավարման գրեթե բոլոր ոլորտները: Բողոքներից առավել մեծ թիվ են կազմում ոստիկանության` 50, շրջվարչակազմերի` 37, Ստեփանակերտի քաղաքապետարանի` 25, դատարանների` 22, գործունեությանն առնչվող բողոքները:
Մարդու իրավունքների պաշտպանի 2008թ. զեկույցի համաձայն, ոստիկանության գործողությունների դեմ ուղղված բողոքները հիմնականում վերաբերել են` անձին ոստիկանության ստորաբաժանումներում անհիմն պահելուն, հարուցված քրեական գործերով հանցագործության բացահայտման ուղղությամբ ակտիվ գործողություններ չձեռնարկելուն, առաջադրված մեղադրանքի անհիմն լինելուն, քաղաքացուն անձնագիր չտրամադրելուն եւ հաշվառում կատարելը մերժելուն:
Մի շարք քաղաքացիների դիմումներում արտահայտված դժգոհությունները արդարադատության որակից հիմնականում վերաբերվում են դատարանների կողմից կայացված վճիռներին, դատավճիռներին եւ որոշումներին: Ըստ ԼՂՀ մարդու իրավունքների պաշտպանի, մտահոգիչ է այն փաստը, որ քաղաքացիների զգալի մասը գերադասում է դատարանին ենթակա հարցերը լուծել արտադատական կարգով, դիմելով պետական այլ մարմինների:
«Դատարանների նկատմամբ հասարակությունում որոշակի անվստահության առկայության մասին են վկայում նաեւ Պաշտպանին հասցեագրված բողոքները:, որոնց մի մասը վերաբերվում է դատավարական օրենսդրության պահանջների խախտումներին, ինչպիսիք են` դատաքննության անհիմն հետաձգման դեպքերը, հայցադիմումը, գործով կայացված վճիռը, դատավճիռը կամ որոշումը կողմերին օրենքով սահմանված ժամկետներում չուղարկելը, դատական նիստի մասին կողմերին պատշաճ չծանուցելը եւ այլն»,-նշվում է ՄԻՊ զեկույցում:
Իսկ շրջաններից ստացված 45 դիմումները հիմնականում վերաբերվում են հողհատկացման եւ հողօգտագործման, պատերազմի հետեւանքով ավերված բնակելի տների վերանորոգման, աշխատանքի տեղավորման եւ մի շարք այլ հարցերին: Ստեփանակերտի քաղաքապետարանի գործունեության վերաբերյալ դիմումները հիմնականում կապված էին հողհատկացումների, շինարարության թույլտվության շինությունների նախագծերի համաձայնեցման ու հաստատման, ինքնակամ կառույցների օրինականացման, բնակարանային պայմանների բարելավման, արտոնյալ հերթում գտնվելու իրավունքն իրականացնելու հետ :
Բավականին մեծ թիվ են կազմում նաեւ բնակարանային պայմանների բարելավմանը վերաբերող բողոքները. նշված հարցով դիմումներ էին ներկայացրել 1-ին կարգի հաշմանդամներ, բազմազավակ ընտանիքների անդամներ, կենսաթոշակառուներ եւ սոցիալապես անապահով խավի ներկայացուցիչներ:
Մյուս ոլորտներին վերաբերող բողոքները հիմնականում կապված են գործատու-աշխատող հարաբերությունների ընթացքում առաջացած աշխատանքային վեճերի, լրացուցիչ աշխատանքի դիմաց չվարձատրվելու, գիշերային ու տոնական օրերի համար հավելավճար չվճարելու եւ մի շարք այլ հարցերի հետ :
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել