Ֆրանսիայում Լեռնային Ղարաբաղի Հանրապետության Մշտական ներկայացուցչության հաղորդագրության համաձայն, ս.թ. ապրիլի 5-ին Ֆրանսիայի Մյոդոն քաղաքի ավանդական վազքարշավին այս անգամ մասնակցում էին նաեւ ԼՂՀ մարզիկներ Աշոտ Հայրապետյանը եւ Արթուր Պետրոսյանը: Ինչպես նշվում է ԼՂՀ արտգործնախարարության տեղեկատվական վարչության կողմից տարածված տեղեկատվության մեջ, 4900մ. վազքատարածության մրցումներում, որին մասնակցում էին ավելի քան 600 մարզիկներ, Աշոտ Հայրապետյանը գերազանցեց բոլորին  եւ գրավեց առաջին տեղը: Վերոհիշյալ տարածությունը մարզիկն անցավ 15 րոպե 37 վայրկյանում` 9 վայրկյանով բարելավելով նախորդ տարվա հաղթողի արձանագրած ցուցանիշը: Արցախցի երկրորդ մարզիկը` Արթուր Պետրոսյանը գրավեց չորրորդ տեղը ընդհանուր մասնակիցների եւ երրորդ տեղը իր կատեգորիայի մասնակիցների թվում: Տեղեկացնենք, որ Մյոդոնի ամենամյա վազքարշավը անց է կացվում 1990թ-ից ի վեր: