Ապրիլի 13-ին մեծ հանդիսությամբ կբացվի Կապանի Ալ. Շիրվանզադեի անվան պետական դրամատիկական թատրոնի մասնաշենքը: Այստեղ անցկացվելու է Շեքսպիրյան միջազգային թատերական 5-րդ փառատոնը:  Անցած տարվա պետբյուջեով թատրոնի մասնաշենքը նորոգելու համար կառավարությունը հատկացրել էր 49մլն. դրամ: Ըստ նախագծի, այն պետք է 2008թ-ի նոյեմբերին հանձնվեր շահագործման: Սակայն շենքի նորոգման աշխատանքները ձգձգվեցին: Շինաշխատանքների իրականացման համար  հայտարարված մրցույթում   հաղթած  Արագածոտնի մարզի «Բերրիություն» ընկերությունը ստանձնած պարտականությունները ժամանակին չկատարելու համար զրկվել է աշխատանքը շարունակելու իրավունքից: Քաղաքաշինության նախարարությունն անվստահություն է հայտնել տվյալ կազմակերպությանն ու տուգանք նշանակել,  իսկ գործը պետք է ավարտին հասցնի մեկ այլ ընկերություն` Հայաստանի թատերական գործիչների միության` «Թատերական»  ՍՊԸ-ն: Հայաստանի թատերական գործիչների նախագահ Հակոբ Ղազանչյանի խոսքով էլ, ինքը անձամբ է հետևում  շինարարական աշխատանքներին: «Ես երբ տեսա նախկինում իրականացված աշխատանքները, ճիշտն ասած, զարմացա: Մտածեցի, պատասխանատուներից որևէ մեկն արդյոք կյանքում ներկայացում չի տեսել, չգիտի, ինչ է բեմն ու մնացած ատրիբուտները: Բայց որակական առումով լավ գործ էին արել»-ասում է Հ.Ղազանչյանը: Վերջինիս համոզմամբ, մարզային ու քաղաքային իշխանությունների  համատեղ ջանքերով, հնարավոր եղավ լուծել Կապանի Ալ. Շիրվանզադեի անվան 75-ամյա թատրոնի մասնաշենքի ոդիսականը: Ավելացնենք, որ թատրոնի նախկին մասնաշենքը  80-ականներին քանդվել էր` նոր շենք կառուցելու ակնակալիքով: Նոր շենքի  շինարարությունը սկսվել էր, բայց Խորհրդային Միության փլուզումից հետո այն այդպես էլ մնաց կիսակառույց: Կապանի քաղաքապետարանը կիսակառույցը մասնավորեցրեց, ու Զանգեզուրի պղնձամոլբդինային կոմբիանտը հիմա այդտեղ բիզնես-կենտրոն է կառուցում: Թատրոնին կառավարության որոշմամբ հատկացվեց նախկին «Սյունիք» կինոթատրոնի շենքը, որը թերևս հարմար էր կինոցուցադրման համար: