Վերջերս Կենտրոնական բանկը կանխատեսում էր արել, որ տնտեսական աճը բյուջեում արձանագրված 9.2 տոկոսից ցածր է լինելու: «Արդյոք դա չի ենթադրում, որ բյուջեն պետք է վերանայվի» լրագրողների հարցին ի պատասխան` ԿԲ նախագահ Արթուր Ջավադյանն ասաց. «Չեմ կարծում, որ բյուջեն պետք է վերանայվի, Կառավարությունն արդեն հայտարարել է այն գործողությունների մասին, որ իրենք իրականացնելու են, Կառավարությունը ծախսերի մի մասը տեղափոխել է երկրորդ եռամսյակից 4-րդ եռամսյակ, եթե փոփոխություններ անելու լինեն, մեր Կառավարությունն ունի այդքան ներուժ»: Արթուր Ջավադյանն ասաց նաև, որ լողացող դրամի քաղաքականությանն անցնելուց հետո ակնկալում էին գնաճային ճնշումներ, «բայց այնքան մեծ էին միջազգային գնանկումային ճնշումները, և այնքան էր նվազել պահանջարկը, որ մենք մարտին ունեցանք 1.4 տոկոս գնաճ, իսկ համեմատած անցյալ տարվա մարտ ամսի հետ` 1 տոկոս գնաճ»: Դրանից հետո, ըստ նրա, ԿԲ-ն երեկ որոշում ընդունեց 0.25 տոկոսով իջեցնել վերաֆինանսավորման տոսկոսադրույքը` այն դարձնելով 7.5 տոկոս: «Դրանով իսկ մենք ազդակ հաղորդեցինք հասարակությանը և ֆինանսական կազմակերպություններին, որ վարելու ենք ոչ թե կրճատողական, այլ ընդլայնողական քաղաքականություն»,- հայտարարեց ԿԲ նախագահը: