2009 թվականի ապրիլի 8-ի երեկոյան, Երեւանի Հյուսիսային պողոտայում իր մասնագիտական պարտականությունները կատարելիս ոստիկանների կողմից ծեծի է ենթարկվել «Ա1+»-ի լրագրող Դավիթ Ջալալյանը: Լրագրողին առաջին օգնություն ցույց տալուց հետո շտապ օգնության մեքենայով նրան տեղափոխել են հիվանդանոց: Բժիշկները նշել են, որ նրա կյանքին վտանգ չի սպառնում, բայց որոշ ժամանակ պետք է մնա հսկողության տակ: Սա առաջին դեպքը չէ, որ լրատվամիջոցների ներկայացուցիչների աշխատանքը ապօրինաբար խոչընդոտում են հենց իրավապահները` վստահ լինելով, որ չեն պատժվի: Մենք` լրագրողական կազմակերպություններս դատապարտում ենք ոստիկանների անհամաչափ գործողությունները` իր մասնագիտական պարտքը կատարող լրագրողի նկատմամբ եւ պահանջում ենք ՀՀ ոստիկանության ղեկավարությունից` նշանակել ծառայողական քննություն եւ պատասխանատվության ենթարկել այդ բռնությունը կատարած անձանց: Խոսքի ազատության պաշտպանության կոմիտե Երեւանի մամուլի ակումբ ԶԼՄ-ների աջակցության «Ինտերնյուս» ՀԿ Բազմակողմանի տեղեկատվության ինստիտուտ-Հայաստան Ժուռնալիստների «Ասպարեզ» ակումբ