Եգիպտոսում Հայաստանի  դեսպանության եւ մոտ հինգ հազար աշակերտ ունեցող եգիպտական Դր. Ներմին Իսմայիլ միջնակարգ դպրոցների ցանցի (Dr. Nermien Ismail Language Schools) տնօրինության միջեւ ձեռք էր բերվել պայմանավորվածություն, որի համաձայն` դպրոցների 5-րդ դասարանների համար հաստատվել է ուսումնական նախագիծ «Հայաստանը» թեմայով: Այդ կապակցությամբ նախօրեին Եգիպտոսում Հայաստանի դեսպանություն են այցելել դպրոցի տնօրենն ու 20 աշակերտներ եւ հանդիպել դեսպան Ռուբեն Կարապետյանին: ՀՀ ատգործնախարարության մամլո ծառայության փոխանցմամբ` հանդիպման ընթացքում Հայաստանի դեսպանը նշել է նման նախաձեռնությունների կարեւորությունը, որոնք միտված են եգիպտացի երեխաների շրջանում Հայաստանի ու հայ ժողովրդի վերաբերյալ տեղեկության տարածմանը:  Ռուբեն Կարապետյանն ընդգծել  է, որ հայ-եգիպտական բազմադարյա բարեկամությունը հիմնված է ազնվության, նվիրվածության, փոխադարձ հարգանքի վրա, եւ այդ էջերի վերհանումն ու քարոզումն այսօր կենսական նշանակություն ունի: Հանդիպման ավարտին դեսպանը դպրոցի տնօրենին է փոխանցել Հայաստանի, Լեռնային Ղարաբաղի, եգիպտահայության եւ հայ-եգիպտական հարաբերությունների վերաբերյալ գրքեր: