Այսօր ՀՀ բնապահպանության նախարար Ա. Հարությունյանն աշխատանքային այցով մեկնել է  Արարատի մարզ, անցկացնելու խորհրդակցություն   նվիրված`  Արարատյան դաշտավայրում ջրային ռեսուրսների արդյունավետ օգտագործման և   պահպանության խնդիրներին:

Արարատյան դաշտավայրի ստորգետնյա ջրային ռեսուրսների օգտագործման խնդիրները միշտ եղել է նախարարի ուշադրության կենտրոնում, դրանց արդյունավետ կառավարման և փաստացի իրավիճակը արձանագրելու նպատակով ստեղծվել են 10 աշխատանքային խումբ, որոնք մարզպետարանի համապատասխան վարչությունների և տեղական ինքնակառավարման մարմինների աշխատակիցների հետ համատեղ կիրականացնեն ուսումնասիրություններ, ըստ հաստատված ժամանակացույցի և հարցաշարի:

Նախարար Արամ  Հարությունյանը աշխատանքային հանձնախմբերի անդամներին, մարզպետարանի աշխատակիցներին, մարզի համայնքների ղեկավարներին ներկայացրեց մարզում ջրային ռեսուրսների պահպանության ոլորտում առկա վիճակը և  անելիքները:

Նա նշեց, որ մարզում ջրօգտագործումն իրականացվում է մի շարք թերություններով, ջրառը շատ դեպքերում իրականացվում է առանց ջրաչափերի, կա տրամադրված փաստացի ջրօգտագործման ջրաքանակների համապատասխանեցման, ինչպես նաև ջրահեռացման հարցեր:   Խնդիր է դրվել տնտեսվարողների գործունեությունը բերել օրինական դաշտ:

Նախարարը տեղեկացրեց, որ այդ աշխատանքները ավարտվելու են երկու շաբաթից, իրական պատկերն ունենալուց հետո կիրականացվեն օրենսդրությամբ սահմանված համապատասխան գործողություններ կարգազանցների նկատմամբ:

Այս խնդրի լուծման գործում նախարարն ակնկալում է մարզպետարանի, համայնքների ղեկավարների աջակցությունը:  Արարատի մարզպետ Է. Բարսեղյանը կարևորեց խնդիրը մարզի բնակչությանը ոռոգման և խմելու ջրի ապահովման տեսանկյունից և մարզպետարանի անունից պատրաստակամություն հայտնեց աջակցել հանձնախմբերի աշխատանքներին: Համայնքների ղեկավարները ևս կարծիք հայտնեցին, ասելով, որ նախարարի ներկայացրած  նախաձեռնությունը համահունչ է բնակչության շահերին և կօգնի լուծել սոցիալական խնդիրները, քանի որ, ըստ իրենց ներկայացրած տվյալների, չկարգավորված ջրօգտագործումը պատճառ է դարձել գյուղատնտեսության անկմանը:

Նախարար Ա. Հարությունյանը  խորհրդակցության մասնակիցներին հավաստիացրեց, որ ջրօգտագործման նոր թույլտվություններ չեն տրամադրվի, մինչև չկարգավորվի առկա ջրօգտագործումը: Նա կարևորեց նաև երկրորդային ջրերի օգտագործման հարցի լուծումը, որպես ջրխնայողության հեռանկարային տարբերակ նշեց ձկնաբուծական տնտեսությունների՝ փակ շրջանառու համակարգին անցնելը:

Նախարարը կարևորելով Արարատի մարզում առկա բնապահպանական խնդիրները, հավաստիացրեց որ դրանք լինելու են  իր մշտական և անմիջական հսկողության տակ, ակնկալելով նաև մարզպետարանի աջակցությունը խնդիրներին վերջնական լուծում տալու գործում:

ՀՀ բնապահպանության նախարարության մամուլի բաժին