Դարձյալ հիշեցին Ստեփանակերտի դրամատիկական թատրոնի մասին
Ստեփանակերտի պետական դրամատիկական թատրոնի անմխիթար վիճակի ու կապիտալ վերանորոգման անհրաժեշտության մասին խոսում են տարիներ շարունակ, սակայն այն մինչեւ հիմա մնում է նույն վիճակում: Վերջին տարիներին մի քանի մշակույթի նախարար է փոխվել, եւ ամեն մեկն իր պարտքն է համարել խոսել այդ մասին ու որոշակի խոստումներ տալ:
Ամեն անգամ թվում էր, թե ուր որ է հարցը լուծում կստանա, սակայն դարձյալ ոչինչ չփոխվեց: 2007թվականին նշվել էր, որ թատրոնի կապիտալ վերանորոգման համար անհրաժեշտ է շուրջ 3 մլն ԱՄՆ դոլար, որը Ղարաբաղի պետբյուջեից հատկացնելը դժվար էր, ուստի պետք էր հովանավորներ գտնել: Ստեփանակերտի միակ թատրոնի մասին հիշեցին նաեւ երեկ` ԼՂՀ վարչապետ Արա Հարությունյանի եւ ՀՀ մշակույթի նախարար Հասմիկ Պողոսյանի հետ հանդիպման ժամանակ: Հանդիպմանը նշվեց, որ թատրոնի վերականգնման խնդիրը պետք է «հիմնավոր լուծում գտնի հայաստանյան օժանդակությամբ»: Թե երբ եւ կոնկրետ ինչ միջոցներով հարցը լուծում կստանա` չնշեցին: Տեղեկացնենք նաեւ, որ այսօր ԼՂՀ եւ ՀՀ մշակույթի նախարարությունների միջեւ համաձայնագիր է ստորագրվել:
Մեկնաբանել