Վերջերս Ստեփանակերտի «Արմենիա» հյուրանոցի տնօրինությունը մասնակցեց Մոսկվայում անցկացված ամենամյա միջազգային տուրիստական ցուցահանդեսին, որը կազմակերպվել էր Տուրօպերատորների եւ ՀՀ հյուրանոցների ասոցիացիաների համատեղ ուժերով: Ի դեպ, հետաքրքրական է, որ միջոցառումը տեղի ունեցավ «Կրոկուս-էքսպո» ընկերության ցուցասրահում, որի տերը ազգությամբ ադրբեջանցի է:

Ինչպես գրում է «Ազատ Արցախ» թերթը, Լեռնային Ղարաբաղը մասնակցում էր ոչ թե առանձին տաղավարով, այլ ՀՀ տաղավարում` փոքրիկ սեղանիկով, որտեղ ցուցադրվում էր արցախյան ավանդական չիրն ու չամիչը, «Արցախալկո»-ի խմիչքները, զբոսաշրջային գրավչությունները եւ հյուրանոցային համակարգը գովազդող բուկլետներ եւ այլն: Հյուրանոցի տնօրեն Ռոբերտ Սիմոնյանի խոսքերով, «Արմենիա» հյուրանոցի տեղեկագրերին ու վեբ-կայքին ծանոթանալով, ցուցահանդեսի այցելուները զարմացած էին Ղարաբաղում նման մակարդակի հյուրանոցի առկայությամբ:

Ցուցահանդեսի այցելուներին հիմնականում հետաքրքրում էր  Ղարաբաղում հարմարավետ հանգստի ապահովման մակարդակը` սկսած հյուրանոցային պայմաններից մինչեւ սպասարկման որակ, ենթակառուցվածքների վիճակ եւ այլն: