Տեսանյութեր
Լուսանկարներ
Ֆրանսահայ քանդակագործ Թորոս Ռաստկելենյանը՝ Սփյուռքի նախարարությունում
ՀՀ սփյուռքի նախարարության նախաձեռնությամբ ապրիլի 21-24-ը Երեւանում տեղի կունենա Ճարտարապետների համահայկական համաժողով,որի աշխատանքներին մասնակցելու համար Հայաստան են ժամանել հարյուրավոր հայ ճարտարապետներ,արվեստագետներ: Նախարարության մամուլի եւ հասարակայնության հետ կապերի վարչությունը տեղեկացնում է, որ ֆրանսահայ ճանաչված քանդակագործ Թորոս Ռաստկելենյանին հյուրընկալեց սփյուռքի նախարար Հրանուշ Հակոբյանը:
Նախարարը ջերմորեն ողջունեց մեծանուն քանդակագործին եւ շնորհավորեց նրան`Ֆրանսիայի Հանրապետության բարձրագույն պարգեւին`Պատվո Լեգեոնի շքանշանի արժանանալու կապակցությամբ:
Տիկին Հակոբյանը նշեց, որ լավատեղյակ է արվեստագետի անցած` բազում դժվարություններով լեցուն, բուռն ստեղծագործական ուղուն եւ այդ ընթացքում արված հայաշունչ-ոգեղեն քանդակներին, որոնցից շատերն այսօր իրենց պատվավոր տեղն են զբաղեցնում ինչպես Ֆրանսիայի քաղաքներում, այնպես էլ աշխարհի տարբեր հեղինակավոր թանգարանների ցուցանմուշների շարքում:
Հանդիպման ընթացքում, ֆրանսահայ քանդակագործը պատրաստակամություն հայտնեց իր աշխատանքներից մեկը`Սայաթ-Նովայի քանդակը, նվիրել քաղաքամայր Երեւանին:
Անդրադառնալով ճարտարապետների համահայկական համաժողով անցկացնելու սփյուռքի նախարարության նախաձեռնությանը, Թորոս Ռաստկելենյանը միանգամայն գործնական ու հեռատես քայլ անվանեց այն, համոզմունքով, որ համաժողովը կարող է շրջադարձային լինել աշխարհասփյուռ հայ ճարտարապետական ներուժի համախմբման եւ դրա ահռելի դրական ազդեցությունը Հայրենիքի ճարտարապետական հիմնախնդիրների լուծմանը ծառայեցնելու համար:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել