«Թեղուտ» ՓԲԸ-ի գործադիր վարչության անդամ Ռուբեն Պապոյանի տեղեկացմամբ այս պահի դրությամբ հանքավայրի շահագործման նպատակով Թեղուտում 22 հա անտառ է հատվել:  Ապրիլի 18-ին  Թեղուտի պղինձ-մոլիբդենային հանքավայրի տարածքում ՀՀ և ԼՂՀ բուհերի մասնակցությամբ կազմակերպված ուսանողական շրջայցին և ծառատունկին մասնակցեցին  9  ԲՈՒՀ-երի 130 մասնակիցներ: Ծառատունկը իրականացվում էր  հանքավայրի շահագործման հետևանքով անտառային տնտեսությանը հասցվելիք վնասի փոխհատուցման նպատակով: Թեև անձրևային և ցուրտ եղանակին, ըստ  Ռուբեն Պապոյանի Թեղուտի «Տանձուտ» հանդամասում տնկվեցին  931` ընկուզենու, շագանակի և հացենու տնկիներ: «Մինչև հիմա  տնկվել է 1260 ծառ»,- հայտնեց Ռ. Պապոյանը: «Վալլեքս» ընկերությունների կողմից անտառավերականգնման նպատակով կազմակերպվող  ծառատունկերին միանշանակ չեն վերաբերվում թեղուտցիները: «Անտառը կտրելուն անձամբ ես համաձայն չեմ: Համաձայն չեմ բոլորովին: Էս ծառը գցելուն էլ չեմ համաձայն: Դրա հմա, որ շլլու ա, մինն էլա աճիլ չտի»,- ասաց Թեղուտ գյուղի բնակիչ Սուրեն Ճիճիլյանը: Թե ինչու չեն աճելու գցված տնկիները, նա բացատրեց. «Քանի որ անտառը պետք ա մշակվի, որ ծառը աճի, 100% էդ գցված ծառերը չեն մշակվելու: Հլե մի երկու տոկոս ապրանք  բաց թողին`վսյո էլի: Ուրիշ տեղ չկա ապրանքը արածացնելու բա ինչ տեն անիլ: Գեղացիք մի կտոր պանրի համար ապրանք են պահում, ապրանքն էլ, որ բաց չթողան, կարա՞ն տանը խոտով ապրանք պահեն»: