Լսել են Ստեփանակերտի քաղաքապետի հաշվետվությունը
ԼՂՀ կառավարության այսօրվա նիստի օրակարգում ընդգրկված էր միայն մեկ հարց. նիստի մասնակիցները լսեցին Ստեփանակերտի քաղաքապետարանի 2008 թվականի գործունեության մասին հաշվետվությունը: Քաղաքապետ Վազգեն Միքայելյանի տեղեկացմամբ, համայնքի բյուջեի ընդհանուր եկամուտների կատարողականը կազմել է 597,7 մլն դրամ կամ պլանավորվածի 87,7 տոկոսը, ինչը նախորդ տարվա նկատմամբ աճել է 32,9 տոկոսով, իսկ սեփական եկամուտները կատարվել է 78,4 տոկոսով:
Անդրադառնալով քաղաքաշինության ոլորտում իրականացված աշխատանքներին, Վ.Միքայելյանը հայտնել է, որ կապիտալ վերանորոգվել են թվով 5 բազմաբնակարան շենքերի տանիքներ, զոհված ազատամարտիկների ընտանիքների` հրետակոծությունից տուժած 39 բնակելի տուն, ավարտին են հասցվել մայրաքաղաքի մի քանի փողոցների բարեկարգման աշխատանքները, ինչպես նաեւ սկսվել է մի շարք փողոցների բարեկարգումը: Ազատամարտիկների փողոցի թիվ 9 շենքի թվով 8 բնակարաններ տրամադրվել են զոհված ազատամարտիկների ընտանիքներին, իսկ Տիգրան Մեծ փողոցի թիվ 25 շենքի թվով 21 բնակարաններ տրամադրվել է նույն փողոցի վթարային հանրակացարանային շենքի բնակիչներին:
Խոսելով քաղաքապետարանի գործունեության մասին, վարչապետ Արայիկ Հարությունյանն իր հերթին նկատել է, որ 2008-ի ցրտաշունչ ձմռան եւ մարտ ամսում ուժեղ քամու հետեւանքով առաջացած դժվարությունները կարողացել են հաղթահարել: Թվարկելով կատարված մի շարք աշխատանքներ վարչապետը շեշտել է, որ դրանք դեռեւս բավարար չեն եւ պետք է ջանքերն ուղղել Ստեփանակերտն ավելի գեղեցիկ եւ գրավիչ դարձնելուն:
Մեկնաբանել