Երեկ ուշ երեկոյան հայտնի դարձավ, որ «Ծղոտներ» ռեստորանային համալիրից բերման են ենթարկվել ԱԺ պատգամավորներ Լեւոն Սարգսյանի (Ալրաղացի Լյովիկ) եւ Աշոտ Աղաբաբյանի (Բուռնաշ) թիկնապահները: «Ոստիկանական համազգեստներով, սեւ մասկեքով մարդիկ էին` բոլորին օլորեցին, տարան»,- պատմեց ականատեսներից մեկը, ով համոզված է, որ տարվողների մեջ եղել են նաեւ Բուռնաշն ու Ալրաղացի Լյովիկը: Ըստ այլ` չճշտված տեղեկությունների` ոստիկանությանը նման գործողությունների առիթ է տվել այն, որ վերը նշված անձանցից մեկն իր կորտեժով կտրել է ոստիկանապետ Ալիկ Սարգսյանի մեքենայի դիմացը: Տեղի ունեցածի մասին այլ մանրամասներ երեկ չհաջողվեց պարզել: Դեպքի մասին պաշտոնական տեղեկատվություն երեկվա դրությամբ չի տարածվել: Զուգահեռաբար «Մեր դիրքորոշումը շատ հստակ է` Թուրքիան երբեք Հայաստանի հետ սահմանը չի բացի, քանի դեռ չեն վերադարձվել Ադրբեջանի օկուպացված տարածքները, քանի որ ղարաբաղյան հարցը մեր ազգային խնդիրն է, եւ Թուրքիան երբեք չի լքի Ադրբեջանին»: Երեկ կառավարության նիստի ժամանակ նման հայտարարությամբ է հանդես եկել Թուրքիայի վարչապետ Ռեջեփ Թայիփ Էրդողանը: Միաժամանակ նա նշել է, որ մշտապես կապ է պահպանում ԵԱՀԿ Մինսկի խմբի համանախագահների հետ, ապա ավելացրել, որ վերջիններս իրեն խոստացել են շատ մոտ ապագայում լուծում տալ ԼՂ հիմնախնդրին: «Մենք նրանց հանգիստ չենք թողնի, քանի դեռ նրանք չեն կատարել իրենց խոստումները»,- ընդգծել է Էրդողանը: Վերջինս նաեւ շեշտել է, որ ԼՂ հիմնահարցի շուրջ` ՀՀ-ի եւ Ադրբեջանի, իսկ մյուս կողմից` սահմանների բացման շուրջ` ՀՀ-ի եւ Թուրքիայի միջեւ բանակցություններն ընթանում են զուգահեռաբար: Համանախագահները, փաստորեն, Անկարային խոստացել են շուտափույթ լուծում տալ ԼՂ հիմնախնդրին, ինչի դիմաց Թուրքիան պետք է բացի ՀՀ-ի հետ սահմանը: