«Սահմանի բացման դեպքում, Կարսի եւ Իգդիրի ճանապարհային հանգույցներով երթեւեկող եւ վերոնշյալ վիլայեթներում գործունեություն ծավալող ՀՀ քաղաքացիները, գործարարները պետք է խիստ զգուշավորություն ցուցաբերեն ադրբեջանցիների կողմից հրահրումներից ու սադրանքներից խուսափելու համար»,-հայ-թուրքական հարաբերությունները անվտանգության տեսանկյունից ներկայացնող զեկույցում  ասում է Պաշտպանության նախարարության ազգային ռազմավարական հետազոտությունների ինստիտուտի ղեկավարի տեղակալ, վերլուծական կենտրոնի պետ Վահրամ Տեր-Մաթեւոսյանը: Նա գտնում է, որ չնայած այսօր Էդվարդ Նալբանդյանը հայտարարում է, որ բանակցություններում ԼՂՀ-ի հարցը չի քննարկվում, սակայն չկան երաշխիքներ, որ ապագայում Թուրքիան կհրաժարվի իր ասելիքից հանուն ադրբեջանամետ հանգուցալուծման: Սահմանի բացման տնտեսական հետեւանքները վերլուծաբանը դիտարկում է Թուրքիայի ներդրումային հնարավորությունների մասով. «Սահմանի բացումը չի ենթադրում, որ թուրք գործարարները  միանգամից կուղղվեն Հայաստան ու կկատարեն հսկայական ներդրումներ, ըստ կանխատեսումների` ապրանքաշրջանառությունը սկզբնական փուլում չի կարող գերազանցել 300 մլն դոլարը: Փակ սահմանի պարագայում ապրանքաշրջանառությունը ծայրաստիճան անհամաչափ է. 2007 թ. Հայաստանի ներմուծումը Թուրքիայից 40 անգամ գերազանցել է արտահանմանը, մինչդեռ Իրանի ներմուծումը արտահանմանը գերազանցել է մոտ 4 անգամ»: Վերլուծաբանը  գտնում է, որ տնտեսության պաշտպանության համար անհրաժեշտ են  իրավական մեխանիզմների ներդրում, որը պետք է  ընդգրկի համաձայնագրեր, որոնք կկարգավորեն առեւտուրը, տարանցիկ փոխադրումները, առեւտրային չափաբաժինները, տարբեր տեսակի տրանսպորտի գործունեությունը, թուրքական նավահանգիստների օգտագործումը: Կարեւորվեց նաեւ տեղեկատվական հոսքերի տիրապետման մեխանիզմների մշակում, քանի որ  «Հարաբերությունները կարող են ուղեկցվել  տեղեկատվական պայքարով, ապատեղեկատվության տարածման եւ նախահարձակ լինելու սցենարով»: Հարաբերությունների հաստատումը հնարավորություն կստեղծեն կառավարության համար պաշտպանել մշակութային ժառանգությունը, ուստի «հարկավոր է նախապատրաստվել, կատարել Հայաստանի կողմից վավերացման կարիք ունեցող միջազգային իրավական ակտերի հաշվառում եւ  «գույքագրում»: Միջազգային իրավական ակտերին Հայաստանի լիարժեք մասնակցության շնորհիվ հնարավորություն կստանանք երկկողմ եւ բազմակողմ հիմքերի վրա վերահսկել պատմամշակութային ժառանգությունը եւ մասնակցել դրա վերականգնմանը»: Ըստ վերլուծաբանի` Թուրքիան Հայաստանի համար լինելու է դժվար գործընկեր, սակայն պետք է զգուշությամբ մոտենալ այնպնդումներին, թե  Թուրքիայի հետ հարաբերությունների կարգավորման դեպքում Հայաստանի ազգային անվտանգության շահերը կվնասվեն. «Իրական սպառնալիքները կծագեն, եթե դիվանագիտական հարաբերությունների հաստատումից հետո միջնաժամկետ ու երկարաժամկետ առումով չմշակի համապատասխան գործուն ռազմավարություն»