Արմավիրում էր Սվերդլովսկի մարզից ժամանած պատվիրակությունը
Աշխատանքային այցով Հայաստանի էր գտնվում ՌԴ Սվերդլովսկի մարզի Եկատերինբուրգ քաղաքի խոշորագույն առեւտրային կազմակերպություններից մեկի՝ «Բեստ» հոլդինգի գլխավոր տնօրեն Ալեքսանդր Պապովի գլխավորած պատվիրակությունը: Այցի շրջանակներում նրանք եղել են Արմավիրի մարզում, այցելել են Էջմիածնի «Գինու գործարան» ԲԲԸ, ինչպես նաեւ եղել են «ՄԱՊ» ՓԲԸ-ում:
Այցի նպատակն էր ծանոթանալ մարզի արտադրական ներուժին եւ քայլեր ձեռնարկել՝ երկու մարզերի գյուղատնտեսական արտադրանքի ոլորտում համագործակցության համար: Այցի նախավերջին օրը պատվիրակությունը եղավ Արմավիրի մարզպետարանում, որտեղ նրանց ընդունել է մարզպետ Աշոտ Ղահրամանյանը:
Պատվիրակության պատվին մարզպետարանում կազմակերպվել էր «մինի էքսպո» ցուցադրություն, որտեղ ներկայացված էր մարզի գյուղմթերքների արտադրությամբ զբաղվող ընկերությունների արտադրատեսակները: «Մինի էքսպոի» նպատակը մեկն էր՝ հյուրերին հնարավորություն ընձեռել ավելի մոտիկից ծանոթանալու մարզի արտադրողներին, ինչպես նաեւ նրանց կողմից առաջարկվող արտադրատեսակներին:
Ալեքսանդր Պապովի գլխավորած պատվիրակության անդամները մեծ հետաքրքրություն դրսեւորեցին հատկապես կոնյակի ու պահածոների արտադրատեսակների նկատմամբ: Ներկայումս նրանց կողմից իրականացվում է մարկետինգ, եւ առաջիկաւ շաբաթների ընթացքում բանակցություններ կսկսվեն գնային քաղաքականության վերաբերյալ, իսկ երկու ամիս անց կսկսվի նաեւ Արմավիրի գյուղմթերքների արտահանումը ՌԴ Սվերդլովսկի մարզ:
Մեզ հետ զրույցում Արմավիրի մարզպետի օգնական Նվեր Պետրոսյանը փոխանցեց, որ առաջիկայում մի քանի պատվիրակությունների եւս սպասում են, որի արդյունքում էլ կստորագրվեն համագործակցության պայմանագրեր:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել