Ղարաբաղում պետբյուջեից բոլոր ծախսերը կկատարվեն խնայողաբար
Երեկ ԼՂՀ ֆինանսների նախարար Սպարտակ Թեւոսյանը կառավարության նիստում 2008թ. պետական բյուջեի կատարման հաշվետվությունը ներկայացնելուց հետո լրագրողներին նույնպես ծանոթացրեց հանրապետության սոցիալ-տնտեսական վիճակը բնութագրող մակրոտնտեսական որոշ ցուցանիշներին:
Նրա հավաստմամբ, չնայած 2008 թվականի տարեվերջի համաշխարհային ֆինանսական եւ տնտեսական ճգնաժամի ազդեցությանը` տնտեսական աճը հանրապետությունում կազմել է 14.3 տոկոս:
Համախառը ներքին արդյունքը կազմել է 87.1 մլրդ դրամ (2007թ.` 70.8 մլրդ դրամ): Մեկ շնչին ընկնող ՀՆԱ-ն կազմել է 623.1 հազ. դրամ կամ 2036.5 ԱՄՆ դոլար: Ֆինանսների նախարարը լրագրողներին հայտնել է, որ անցած տարվա առաջին 9 ամիսների ցուցանիշները տնտեսական աճի ավելի բարձր ցուցանիշ էին ենթադրում, սակայն համաշխարհային տնտեսական ճգնաժամն իր գործը արեց:
Այնուամենայնիվ, ճգնաժամի պայմաններում Ղարաբաղում շարունակվում են իրականացնել նախատեսված ծրագրերը` ձգտելով հնարավորինս թույլ չտալ ֆինանսական միջոցների ոչ նպատակային ծախսում: Այս մասին երեկ կառավարության նիստում խոսել է նաեւ վարչապետ Արա Հարությունյանը` նշելով, որ ճգնաժամը բացասական մեծ ազդեցություն չունի հանրապետության ընդհանուր սոցիալ-տնտեսական վիճակի վրա, այնուհանդերձ, անցանկալի հետեւանքներ արդեն գրանցվել են 2009թ. առաջին եռամսյակում: Նա ընդգծել է, որ իրավիճակը թելադրում է պետբյուջեից բոլոր ծախսերը կատարել առավելագույնս խնայողաբար:
Գործադիր իշխանության ղեկավարը միաժամանակ վստահեցրել է, որ այս տարի եւս պետության կողմից սոցիալական բոլոր վճարումները կկատարվեն:
Ծավալուն ներդրումները կշարունակվեն հատկապես գյուղատնտեսության եւ շինարարության բնագավառներում: Սպարտակ Թեւոսյանը լրագրողների խնդրանքով նաեւ անդրադարձել է նյութական պահուստի ձեւավորմանը: Նրա տեղեկացմամբ, արդեն ստեղծվել է համապատասխան պետական ոչ առեւտրային կազմակերպությունը, որը կզբաղվի կազմակերպչական աշխատանքներով: Պահուստի մի զգալի մասը, ֆինանսների նախարարի խոսքերով, կազմելու են բենզինն ու դիզվառելիքը, պարենային ապրանքները եւ այլն: Դեղորայքի մասով լրիվությամբ ապահովված ենք, ասաց նախարարը, քանի որ դեղերի պահուստի ձեւավորման գործընթացը սկսվել է դեռեւս տարիներ առաջ: Ս.Թեւոսյանի տեղեկացմամբ` որոշակի տնտեսումներ են անում նաեւ պետական մեքենաների օգտագործման մասով: Այդ նպատակով նախատեսված գումարները ֆինանսավորվում են 70-85 տոկոսով, հայտնել է նախարարը:
Ի դեպ, այս հարցին կառավարության վերջին նիստերից մեկի ժամանակ անդրադարձել է նաեւ վարչապետը, որն արտահայտելով իր դժգոհությունը պետական մեքենաների ոչ նպատակային օգտագործման փաստերի առթիվ, շեշտել է, որ այսուհետ վերահսկողություն է սահմանվելու եւ խախտում կատարողները պատժվելու են:
Մեկնաբանել